Pinag-iingat ng Department of Interior and Local Government (DILG) Mimaropa ang publiko sa posibleng maranasang ashfall sa limang probinsiya sa rehiyon.
Nagpababa ng kautusan ang DILG – Mimaropa na pirmado ni Regional Director Wilhelm Suyko kamakailan, kung saan inaatasan ang lahat ng mga direktor ng kagawaran sa mga lalawigan at lungsod sa rehiyon na ipakalat ang impormasyon sa pamamagitan ng lokal na mga pahayagan o himpilan ng radyo.
Kalakip nito ang Memorandum No. 005, series of 2020 mula sa Office of the Civil Defense (OCD) – Mimaropa kaugnay sa babala sa pagkalat ng abo mula sa bulkang Taal sa Batangas.
Sa babala naman ng Mimaropa Regional Disaster Risk Reduction and Management Council (RDRRMC), inilahad ang mga posibleng panganib sa kalusugan sakaling malanghap ang abo mula sa pumutok na bulkan. Ayon sa RDRRMC, ito ay maaaring magdulot ng baradong ilong at lalamunan, sipon, bronchitis, di komportableng paghinga, eye irritation, pinsala dahil sa posibleng pagbagsak ng mga bubong, aksidente sa kalsada dahil sa madulas at mahirap Makita ang daan. Upang maiwasang makalanghap ng abo, pinapayuhan naman ang publiko na kung maaari ay manatili na lamang sa mga bahay, panatilihing nakasara ang mga pinto at bintana ng bahay, tiyaking hindi napapasok ng alikabok o abo ang inyong mga bahay, gumamit ng dust mask, at magsuot ng salamin sa mata na magsisilbing panangga o proteksyon.
Pinapayuhan din ang mga mamamayan na agad linisin ang mga bubong, maging ang mga alagang hayop ay isilid sa may maayos na silong at obserbahan ang mga babalang pang-kaligtasan sa mga kalsada.
