Limang tindahan sa Odiongan Public Market ang umaaray matapos na mabayaran ng mga pekeng P500 at P1000 bill ng hindi nila nakilalang suspek nitong nakalipas na mga araw.
Ayon sa isa sa may-ari ng tindahan na humiling na itago ang kanyang pangalan, magpapadala sana sila ng pera pambayad sa kanilang order na gulay mula Mindoro ngunit hindi umano ito tinanggap ng bangko at ng pera padala center dahil sa kadahilang peke umano ang ilan sa mga dala nilang bills.
Ang isa sa mga tindahan ay nakitaan ng P500 na pekeng perang papel. habang ang isa naman ay nakuhaan ng P1,000 na pekeng perang papel.
“Problemado kami kasi ‘yung pera P1,000 ay kita na sana namin yan, naging bato pa,” ayon sa isa sa mga may-ari ng tindahan na nakausap ng Romblon News Network.
Paalala naman ng Bangko Sentral ng Pilipinas (BSP) sa publiko, maging mapanuri sa matatanggap na salapi ngayong lalo pa at papalapit na ang Christmas Season dahil sa panahong ito ay naasahan ang paglipana ng mga pekeng pera.
Ayon sa BSP, dapat magaspang ang materyal ng pera kapag hinawakan ang totoong pera. Agad din dapat makita ang mga embossed prints, security fibers, asymmetrical serial numbers, at see-through mark sa mga ito. Makikita rin dapat ang mga nakatagong features at halaga ng pera kapag iniikot ito at tinitignan nang malapitan.
Pagdating naman sa P500 at P1000 bills, dapat ang kulay ng ilang bahagi nito ay nagbabago ng kulay kapag tinitingnan nang malapitan.
