Mariing pinabubulaanan ng isa sa mga tumakbong mayor ng Sibale na si Konsehal Jay Falculan ang lumabas na malisyosong usap-usapan na may binitawan di umano itong mga masasakit na salita laban sa mga miyembro ng Iglesia ni Cristo sa naturang bayan noong panahon ng pangangampanya para sa Election 2019.
Kung totoo man ang ganitong isyu, isa umano ito sa nakikitang dahilan ng mga supporters ni Falculan at ng ilang residente ng isla kung kaya hindi ito ang napiling i-endorso ng liderato ng INC ng Lokal ng Sibale sa kabila ng maganda nitong track record bilang dating kapitan ng Barangay Poblacion, dating Association of Barangay Captains (ABC) President at kasalukuyang numero unong konsehal ng nasabing bayan.
Sa panayam ng Romblon News Network kay Falculan, itinanggi niya ang paratang at ni minsan daw ay hindi sumagi sa kanyang isip na magbitiw ng salita na makakasakit sa sino mang miyembro ng kahit anong relihiyon lalo pa at kung ito ay hindi naman totoo at alam niyang kapwa n’ya rin mga taga Sibale ang maaapektuhan.
Naniniwala daw kasi siya na kahit ano pa man ang kinabibilangang relihiyon ng isang tao ay walang dahilan para husgahan ang mga ito at pagsalitaan ng hindi kaaya-aya dahil pantay-pantay daw ang pagtingin niya sa lahat ng residente ng bayan ng Sibale pagdating sa usapin ng relihiyon.
Marahil daw ay isa lang ito sa mga taktikang ginamit ng kanyang kalaban noong panahon ng kampanya na palabasin at ipagkalat na kunwari ay mayroon siyang binanggit na hindi magandang salita laban sa pamunuan at mga miyembro ng Iglesia ni Cristo ng Lokal ng Sibale upang siraan lang s’ya at ng kanyang partido.
Dagdag pa ni Falculan, ang mismong kalaban pa nga raw niya, ang kasalukuyang mayor, ang siyang nagsalita sa isa sa mga PORA nito sa isang barangay, na kahit hindi raw siya suportahan ng INC ay nakakasiguro pa rin daw ito ng kanilang pagkapanalo.
Inaanyayahan din n’ya ang sinumang may alam tungkol dito na mag labas ng anumang katibayan na mayroon nga siyang sinabing hindi maganda laban sa pamunuan ng INC o ng kahit anong relihiyon upang maipaliwanag n’ya kung ano ang totoo at hindi.
Bagaman at hindi pa niya nakakausap ng personal ang mga opisyal ng INC ng Lokal ng Sibale, lubos naman s’yang nagpapakumbaba at humihingi ng paumanhin sa mga ito tungkol sa malisyosong paninira na lumabas laban sa kanya at ng kanyang partido. Ngayon din lang daw n’ya nalaman ang tungkol sa isyung ito na lubos n’yang ikinabigla dahil hindi n’ya raw kayang gawin ‘yon sa kanyang mga mahal na kababayan.
Nakahanda raw s’yang harapin at kausapin anumang araw mula ngayon ang pamunuan ng INC ng Lokal ng Sibale para klaruhin at tuloy makapagbigay ng kanyang panig hinggil sa isyu.
Umaasa daw s’ya na magkaroon ng kalinawan ang lahat at maunawaan at mapatawad s’ya ng mga posibleng nasaktan at naapektuhan sa lumabas na paninirang ginawa laban sa kanya at ng kanyang partido nitong nagdaang eleksyon.
