Sa patuloy na pag-lipas ng unang mga araw ng 2019 na nasa ilalim ng reenacted budget, ramdam na ng mga empleyado ng Provincial Government ng Romblon ang epekto nito lalo na ng mga nagtatrabaho bilang casuals at job orders.
Ayon kay Amy Mallen ng Provincial Budget Office, may aabot na sa mahigit 100 casuals employees ng provincial government ng Romblon ang nawalan ng trabaho simula pagpasok ng taong 2019.
Mula sa mga opisina ng agriculture, environment, accounting, vice governor's office, sangguniang panlalawigan offices, at hospital ang ilan sa mga empleyado na nawalan ng trabaho dahil sa pagkakaroon ng reenacted budget ang probinsya. Apektado rin umano ayon kay Mallen ang mga casuals na charge sa road projects ng probinsya.
“Yung sahod ng mga casuals at job orders ay part ng essential services pero hindi siya part ng essential operating services na pwede lang pondohan kapag reenacted ang budget,” ayon kay Mallen ng ito ay magsalita sa ginanap ng Full Provincial Development Council Meeting nitong Huwebes, January 17 sa bayan ng Romblon, Romblon.
“Actually na feel na ng mga empleyado for the month of January ngayon, ang pwede po namin i-release na allotment ay only for the month of January ng 2018 kasi nga reenacted and because noong 2018 ang cost ng budget is much lesser than the January requirment,” dagdag pa nito.
“For casuals employees or contractuals employees lalo na sa ospital, nagbawas na. So dahil madami ng regular employees sa ospital na nagretire, ang pangreplace sa kanila ay yung casuals employees or contractuals pero dahil nagbawas nga, apektado ang ating health services. Nagrereklamo nga dahil necessity kung tutuosin, necessity talaga yung tao dahil sinong tatrabaho kung wala yung tao.” pahayag pa ni Mallen.
Hinalimbawa rin ni Mallen ang mga casuals sa kanilang opisina na hindi pa nakakabalik sa trabaho simula ng pagpasok ng January 2019 dahil sa kakulangan ng budget.
“Yung sa opisina nga namin hindi pana-renew yung casuals employee na dati ng kinukuha dahil inuuna po doon sa health kasi mas kailangan pero kung titingnan yung sa health kulang parin,” ayon kay Amy Mallen ng Provincial Budget Office.
Isinisisi ng ilang miyembro ng Provincial Development Council sa kakulangan ng quorum tuwing may Provincial Development Council Meeting dahil sa pag-absent ng mga alkalde kaya hindi naipapasa ang Annual Investment Plan na kinakailangan para maipasa ang kabuang budget ng probinsya para sa 2019.
