Pinarangalan sa ginanap na flag raising ceremony ng Munisipyo ng Odiongan ang pitong criminology students ng Romblon State University matapos magsauli ng napulot nilang wallet sa loob ng Odiongan Public Market nitong nakaraang Linggo.
Mismong si Mayor Trina Firmalo-Fabic ang nagbigay ng certificate sa pitong kabataan sa harap ng mga empleyado ng local government unit, mga kapulisan at mga bombero nitong Lunes ng umaga, September 03.
Kinilala ang pitong 2nd year college students na sina Jay Bernal, Junamil Magayon, Crisel Delos Santos, Jonas Torrechiva, Albert Gado, Michael Joshua Daluz, at Junel Dizon.
Ayon sa Odiongan Municipal Police Station, naglalakad ang mga estudyante sa Odiongan Public Market ng makita nila ang wallet na may lamang P3,050.00 at mga valuable cards na pagmamay-ari ng isang Janeth Salvador.
Agad na nakipag-ugnayan sa otoridad ang 7 estudyante at pinilit na hagilapin ang may-ari ng nasabing wallet hanggang sa maisauli ito.
Sinabi ng Odiongan Municipal Police Station na ang pagiging tapat ng mga estudyante ay dapat tuluran at gawing halimbawa ng iba pang estudyante sa lalawigan.
