Nagsagawa ng malawakang clean-up drive ngayong araw sa bayan ng Odiongan sa Romblon na nilahukan ng mga kawani ng Local Government Unit ng Odiongan, National Agency, Non-Governmental Organisation, mga guro at estudyante ng iba't ibang paaralan, mga opisyal at residente ng lahat ng barangay.
Ito ay kasunod ng pagtaas ng kaso ng mga tinamaan ng dengue virus sa bayan kung saan dalawa sa mga pasyenteng ito ay namatay habang nagpapagamot sa Romblon Provincial Hospital.
Nilinis ng mga nakilahok ang mga kanal magmula sa sentro ng Odiongan hanggang sa dulong mga barangay.
Sa facebook post ni Odiongan Mayor Trina Firmalo-Fabic, sinabi nito na dapat takpan ang lahat ng mga butas o repository ng stagnant na tubig na pwedeng maging breeding area ng mga lamok para makaiwas sa sakit na dengue.
“Nagconduct na ang ating mga barangays ng clean-up at search and destroy nung isang buwan alinsunod sa ating panawagan, ngunit mayroon pa ring mga kaso ng dengue kaya kailangan ng isa pang malawakang paglilinis. Paki-check at siguraduhing malinis ang tabi ng inyong mga bahay,” bahagi pa ng kanyang facebook post.
Paalala ng Department of Health, ugaliing tandaan ang 4S Strategy laban sa dengue: Search and Destroy, Self-Protection Measures, Seek Early Consultation, & Say No To Indiscriminate Fogging.
