Hindi lamang sa Metro Manila area maigting na pinapatupad ang Oplan Tambay kundi maging sa mga bayan sa lalawigan ng Romblon ay sinimulan na rin itong ipatupad. Sa bayan ng Odiongan halimbawa ay pinaigting ng Odiongan Municipal Police Station ang pagpapatupad sa ordinansa ng lokal na pamahalaan ng Odiongan na nagtatakda ng ‘curfew' sa menor de edad simula 10:00 PM hanggang 4:00 AM. Ang nasabing pagkilos ng mga kapulisan ay kaugnay na rin sa direktiba ng Pangulong Duterte na ipatupad sa buong bansa ang nasabing operasyon.
Matatandaang matapos ipatupad ng PNP ang Oplan Tambay ay umani ito ng batikos lalo pa't may mga kwestyonableng insidente tulad ng kaso ni alyas Tisoy na namatay sa kulungan matapos hulihin at ikulong kaugnay ng Oplan Tambay. Kaya ang hiling tuloy ng ilang progresibong grupo at mga senador ay ipatigil ito.
Maayos at malinaw na pagpapatupad
Kung bakit nagkakaroon ng pagdududa at kwestiyon ukol sa Oplan Tambay ay dahil na rin sa hindi malinaw na panuntunan ng pagpapatupad nito. Isa na ang Commission on Human Rights (CHR) na nagpahayag na dapat munang isuspende ang pagpapatupad nito. Mantakin mo nga naman, sa mga na-upload ng videos sa social media, makikitang may mga insidente na naghihintay lang ang grupo sa labas o tapat ng kalsada ay hinuli na, nakasuot pa ng kanilang uniform sa trabaho ang grupo, tapos hinuli pa rin. Meron namang tila may sinilip lang sa labas ng pinto ng bahay, nagkataon namang may pulis, kaya nilapitan at hinuli rin.
Sa gitna ng pagbatikos ng mga progresibong grupo kontra Oplan Tambay, sinabi ni Pangulong Duterte sa kanyang talumpati sa Davao City na hindi naman nya umano inutos na arestuhin ang mga tambay kundi sabihan lamang itong wag magumpokan at umuwi na lang sa kani-kanilang bahay.
Sa ibang bayan katulad na lamang ng Odiongan, Romblon na pinaigting ang kanilang operasyon kontra sa pagtambay at gala ng mga menor de edad sa loob ng alas 10:00 ng gabi hanggang 4:00 ng madaling araw, maliban na lang sa mga excluded na sitwasyon katulad na kapag may kasamang magulang, galing sa mga gawain sa simbahan at paaralan.
Ang operasyon ng Odiongan MPS kontra sa mga menor de edad ay alinsunod sa Odiongan Municipal Ordinance No. 2005-08, “AN ORDINANCE FORBIDDING MINOR OF ANY SEX WANDERING OR LOITERING ON PUBLIC PLACE AFTER TEN O'CLOCK (10:00 PM) IN THE EVENING AND BEFORE FOUR O'CLOCK (4:00 AM) IN THE MORNING, THIS MUNICIPALITY AND PROVINCE.”. Ang nasabing ordinansa ay pinagtibay sa bisa ng Odiongan Sangguniang Bayan Resolution No. 2005-68 noong ika 24th Regular Session, July 14, 2005.
Sa paglilinaw kay SPO3 Evaristo Famero Jr. ng Odiongan MPS noong Sabado (June 23) at kay Mayor Trina Firmalo-Fabic ng Bayan ng Odiongan, sa programa na Mata ng Bayan – Radyo Natin FM anchored nina Mr. Emmanuel ‘Awe' Eranes at Ka Ressie Fos, kinompirma ng dalawa na ang nasabing ordinansa ay specific lamang sa mga menor de edad, alinsunod sa probisyon ng ordinansa, at hindi umano ito sumasaklaw sa mga hindi menor de edad. Dagdag pa ni Mayor Trina Firmalo-Fabic, wala pa umanong ordinansa ang lokal ng pamahalaan ng Odiongan kaugnay sa pagtatambay ng mga hindi menor de edad.
Ayon sa Section 5 ng nasabing ordinance, kapag ang pulis ay may nakitang minors na gumagala o tumatambay sa loob ng nabanggit na oras ng curfew, ay kanila itong papauwiin (o ihahatid pauwi sa kanilang bahay). Kapag hindi sumunod sa pulis ay magiging paglabag ito sa nasabing ordinansa ay may kaukulang penalidad katulad ng isang oras na counseling at 3-5 days na community services depende sa bilang ng offense ng lumabag.
Dahil sa maayos na pagpapatupad ng Odiongan MPS kontra sa mga gumagala o tumatambay na menor de edad, positibo naman ang feedback dito ng mga residente.
Samantala, sa parehong programa na Mata ng Bayan sa Radyo Natin FM nitong Sabado ay binigyan diin ni Bishop Ronelio Fabriquer ng IFI – (guest sa nasabing programa) na dapat umano ay ma define ng mabuti ang salitang tambay at matiyak na tama ang pinapatupad na panuntunan ng mga kapulisan upang matiyak na walang magiging paglabag sa karapatang pantao ng mga residenteng nahuhuli. Dagdag pa ni Bishop Fabriquer, kung sakali man na may mahuli at madala sa presento, hindi dapat umano ihalo sa selda ng mga hard criminals ang mga nahuling tambay kundi magkaroon na hiwalay dapat na detention area ang mga ito upang maiwasan ang mga insidenteng katulad sa nangyari kay Tisoy.
