Sugatan ang lima katao sa magkahiwalay na aksidente na kinasangkutan ng motorsiklo nitong gabi ng Biyernes, April 06.
Nangyari ang unang aksidente sa kahabaan ng Firmalo Boulevard sa Barangay Tabin-Dagat bandang alas-11 ng gabi kung saan isang lalaking rider ang sumimplang matapos makasagi ng isang bata.
Nagtamo ng galos ang bata at ang rider kaya agad silang isinugod sa Romblon Provincial Hospital.
Ayon sa Odiongan Municipal Police Station, nag-uusap na umano ang magkabilang panig para sa settlement.
Sa Barangay Tumingad naman, tatlong babae ang sugatan matapos na sumalpok ang sinasakyan nilang motorsiklo sa concrete barrier na nasa gilid ng National Road.
Ayon kay Louie Falcunit, Barangay Captain ng Barangay Tumingad, pauwi na umano sana ang tatlo sa Barangay Libertad galing sa Pasagudar Party sa Tabin-Dagat ng maaksidente sa bahagi ng kalsada. Kinilala ni Falcunit ang driver ng motorsiklo ay anak di umano ng Municipal Treasurer ng bayan ng Odiongan.
Hindi pa alam ng Romblon News Network ang pagkakilanlan sa iba pang mga nasangkot sa aksidente.
