Patay ang isang pahinante matapos itong tumalon at magulungan ng sinasakyang elf truck sa Barangay Tubigon, Ferrol, Romblon nitong tanghali ng Huwebes, March 15.
Kinilala ang pahinante na si Leopoldo Alcoran Meran, 44-taong gulang.
Ayon sa driver ng truck na kinilalang si Joey Sim Alawan, 47, magdedeliver sana sila ng mga buhangin patungo sa isang construction site ngunit pagdatin umano sa bahagi ng National Road sa Barangay Tubigon ay bigla umanong nawalan ng preno ang kanyang truck.
Isinalpok ng driver ang truck sa stockpile para tumigil ngunit paglabas niya ay nakita niyang nagulungan na ang pahinante .
Tumalon umano ang pahinante sa truck matapos mag panick dahil sa inaakalang mahuhulog ang truck sa bangin na nasa gilid ng kalsada. Sa pagtalon nito ay na out of balance umano ito at natumba hanggang sa magulungan ng truck ang kanyang ulo.
Sinubukan pang dalhin sa Romblon Provincial Hospital ang biktima ngunit idineklara itong dead on arrival.
Samantala, tumalon rin ang isa pang pahenante na napag-alamang anak ni Leopoldo Meran na si Randy, 23-anyos, nagtamo lamang siya ng galos.
Dinala muna ang driver na si Joey Sim Alawan sa Ferrol Municipal Police Station upang idetine. Posibleng maharap sa kasong reckless improducence resulting to homicide ang driver.
