Dalawang libo animnapu’t walo na maralitang senior citizens sa bayan ng Romblon ang tumanggap ng kanilang social pension mula sa pamahalaang lokal noong Setyembre 14-15.
Ang pamamahagi ng pensyon ay ginanap sa covered court ng Romblon Public Plaza sa pangunguna ng Municipal Social Welfare and Development Office at pakikipagtulungan ng mga empleyado ng pamahalaang bayan ng Romblon.
Sinabi ni Office for Senior Citizen Affairs (OSCA) Head Lydia G. Canoy na patuloy ang isinasagawang pamimigay ng pamahalaan bayan ng Romblon ng social pension sa mga mahihirap na nakatatanda kung saan may kabuuang P3.102 milyon ang ipinamahagi nila.
Bawat benepisyaryo ay tumatanggap ng tig-P500 kada buwan at ang kanilang tinanggap ay kabayaran para 3rd quarter ng 2017 o mula Hulyo hanggang Setyembre.
Ang programang Local Social Pension for Indigent Senior Citizen ng Department of Social Welfare and Development (DSWD) ay alinsunod sa R.A. No. 9994 o Expanded Senior Citizens Act of 2010 na nag-aatas sa lokal na pamahalaan na pagkalooban ng buwanang pensyon ang mga kapus-palad na nakatatanda sa lokalidad upang matugunan ang mga pangangailangan ng mga ito partikular ang pagkain at gamot.
Sakop ng batas na ito ang mga mahihirap o indigent senior citizens na nanghihina na, sakitin, may kapansanan at walang natatanggap na pension o permanenteng pinagkukunan ng kita o suporta sa miyembro ng pamilya.
Ang mga naturang senior citizens ay nakapasa sa requirement ng DSWD National Household Targeting System for Poverty Reduction kung kaya nakasama sa talaan ng mga pensioners.
Nilalayon ng Social Pension Program na maisaayos ang pamumuhay ng mga mahihirap na senior citizen sa pamamagitan ng pagbibigay ng kakayahan sa mga ito na makabili ng pagkain, gamot at bitamina.
Naniniwala ang LGU Romblon at Municipal Social Welfare and Developnment Office (MSWDO) na malaki ang maitutulong nito upang mabawasan ang kaso ng kagutuman at maprotektahan ang karapatan ng mga mahihirap na matanda sa bansa.
