Matagumpay na idinaos kahapon ang Buntis Congress sa bayan ng Romblon sa pangunguna ng Rural Health Unit (RHU)-Romblon at pakikipagtulungan ng pamahalaang bayan ng Romblon taglay ang temang: “Healthy Baby sa Wise na Mommy.”
Ayon kay Municipal Health Officer Dr. Merly Valen H. Malorca, nasa 110 na mga nagdadalantao o mga buntis mula sa 31 barangay ng bayan ng Romblon ang dumalo sa Buntis Congress na ginanap sa covered court ng Romblon public plaza.
Ang naturang kongreso ay kinapalooban ng mga lectures sa kahalagahan ng pre-natal check-up, sintomas ng mga panganib sa panahon ng pagbubuntis at maaaring komplikasyon sa panahon ng pagdadalantao (Danger signs and Pregnancy complications), pagkakaloob ng immunization sa nanay at sanggol, 3 delays, tamang pagpaplano ng pamilya (Family Planning), benepisyong makukuha ng sanggol kapag nagpapasuso ang nanay at mga benebisyong makukuha sa Philhealth & Social Security System (SSS).
Aniya, ang aktibidad na ito ay hakbang ng kagawaran ng kalusugan para makamit ang Millennium Development Goals (MDG) na mapabuti ang kalusugan ng mga ina at mapababa ang bilang ng mga babaeng namamatay dahil sa komplikasyon habang nanganganak.
Sinabi rin nito na batay sa ordinansang ipinaiiral ng lokal na pamahalaan ng Romblon, mahigpit ng ipinagbabawal ang panganganak sa mga bahay upang sa gayon ay maiwasan ang kapahamakan ng mga ina at sanggol dulot ng mga komplikasyon.
Ang mga nagdadalantao aniya ay kinakailangang sa hospital, health centers at barangay health stations lamang maaaring manganak kung saan mayroong birthing facility at maaasikaso ng maayos ng mga doktor, nurses at midwife upang maiwasan ang malagay sa panganib habang nanganganak.
Layunin ng pagtitipon na mahikayat ang mga buntis na magsilang sa ospital o health centers upang masiguro na mabibigyan ng tamang pangangalaga at atensiyon bago, habang at pagkatapos na magsilang ng bata.
Bago nagtapos ang naturang congress ay namahagi ang Buntis Kits ang RHU personnel sa mga ilaw ng tahanan na dumalo na kanilang magagamit sa sanggol na kanilang ipapanganak at nakatanggap rin ang mga ito ng isang kahon ng Kellogs mula sa pamunuan ng Philippine Red Cross – Romblon Chapter.
Kabilang sa mga panauhing dumalo ay sina Sangguniang Bayan Member Melben M. Mesana, Ronald Geronimo, chief of staff of the Office of Vice Governor at Karyl Fabicon, kinatawan mula sa Provincial Health Office – MNCHN.
