Hindi ba kayo nagtataka kung bakit sa kabila ng paulit-ulit na pagpapaigting ng tourism promotion at marketing efforts ng gobyerno ay hindi makatake-off ang sektor ng turismo sa piling mga lalawigan at bayan sa bansa?
Binuhusan na ng pondo ang imprastraktura, bagong tayo ang mga government-owned tour sites, hindi matawaran ang ganda ng mga atraksyon sa maraming bahagi ng Pilipinas ngunit inaagiw ang mga ito at nilalangaw ang booking sa nasabing mga pasilidad-turismo.
Sa lalawigan ng Romblon, sa gitna ng araw-araw na biyahe ng barko mula Batangas Port at Caticlan papuntang Odiongan, komersiyo lamang ang umangat kahit na katambal na obhektibo dito ay ang pagpapasigla ng turismo.
Maganda man ang epekto, marami ang nakukulangan sa pakinabang dito. Tama nga naman, hihinto na lang ba tayo at makukuntento sa “okay na?”
Kung ang target ay turismo, hindi Tablas ang akma para dito. Nasa Romblon at Sibuyan ang patok na pasyalan, bakit ta-tatlong beses ang biyahe ng maaasahang serbisyo ng barko?
Hindi kaya medyo lihis ang prayoridad, ill-advised, walang masusing pag-aaral at ipinagpapapalit-lipat ng mga politiko ang alokasyon sa mga proyekto?
One case in point, ang paliparan sa Tugdan sa bayan ng Alcantara. Hindi lang tatlong piloto ng pangunahing airlines ang napagtanungan ko noong tayo noon ay nasa gobyerno, pati CAB at CAAP officials ay nadamay dito: anong mali sa Tugdan, bakit iilan lang ang biyahe at maliliit na eroplano ang lumalapag dito? Sagot nila'y iisa na parang koro: runway ninyo'y maiksi at pangit na ang semento.
Pinaunlakan tayong bisitahin ni dating Pangulong Noynoy ‘PNoy' Aquino ang lalawigan sa pista ng Romblon, Romblon noong January 2015. Doon ipinaalam natin kay DOTC Secretary Jun Abaya- na siya ring naging instrumento sa biyahe ng 2Go Travel sa kabiserang bayan at Odiongan – ang P40 milyong alokasyon para sa extension at pagsasaayos ng Tugdan Airport terminal.
Ito ay isang pagkilala sa pangangailangan at direktang kaugnayan ng transportasyon sa pagpapasigla ng turismo. Sino nga namang turista ang mag-aaksaya ng sampu hanggang dose oras na biyahe one-way?
Ngayon, isasakatuparan na ang nasabing proyekto. Ayon sa Romblon News, matutuloy na ang rehabilitasyon ng Tugdan Airport sa P40.5 milyong alokasyon ng DOTr. Binuksan na nga ang proseso ng bidding para dito. Buti naman at hindi pinakialaman ang nakalaang pondo.
Batay sa nasabing ulat, bahagi lamang ito ng P1.1 bilyong halaga ng proyekto para sa anim pang ibang paliparan sa bansa kabilang ang General Santos International Airport, Calbayog Airport, Sanga-Sanga Airport, Catarman Airport, Siquijor Airport, at Ozamiz Airport.
Speaking of airports, tila nakalampas sa paningin ni Secretary Art Tugade ang Davao International Airport. Ayon sa ating U_spy na noong nakaraang linggo ay nasa lungsod ng Pangulo, “nakakaawa ang mga senior citizens at mga sanggol dito, parang pugon sa init sa loob ng airport terminal.
Sira ang aircon at sabi ng mga empleyado, matagal-tagal na rin ang sitwasyong ganto.” Paging DOTr pipol! Ano pang hinihintay ninyo? Patu-tokhang pa ba muna bago kumilos kayo?
Tandaan: Ang tao'y nilalang na politiko pero mas madalas ang politiko'y nanlilinlang ng tao! (Twitter: follow@dspyrey)
