Matapos bigwasan ni Pangulong Duterte noong Hulyo ang walang kapararakang gastos ng gobyerno gaya ng mga biyaheng walang patumangga ng mga local officials, umaasa ang maraming kababayan na matitigil na ang mga “lakbay-aral” ng mga konsehal at lokal na kawani.
Ngunit sadya yatang manhid sa sentimyento ng bayan ang ilan sa atin. Walang pakialam sa mga alituntuning nalalabag at sa direksyon ng polisiyang dapat sundan. In the guise of its observance of the 116th Anniversary of Philippine Civil Service, kasalukuyang nagtatampisaw sa dalampasigan ng Boracay Island sa Malay, Aklan ang umaabot sa 60 mga kawani ng isang munisipyo sa lalawigan ng Romblon sa pangunguna ng kanilang bagong alkalde.
Bagamat magtatapos na bukas, ika-2 ng Oktubre, ang lamyerda, este, team-building pala, dalawang araw namang napagkaitan ng serbisyo ang kanilang mga kababayang nasasakupan. Huwebes kasi tumulak ang grupo papuntang Boracay. Kahit walang opisyal na deklarasyon ang Palasyo ng Malakanyang, nagmistulang long weekend ngayon para sa mga anak ng diyos na iilan. Sarap-buhay ano, ha?
Ito pa kamo, mga kababayan ko sa Romblon. Marso ang Women's month at madalas sa buwang ito idinadaos ang mga pagdiriwang ukol sa temang ito, ngunit ang nasabing team building sa Boracay ay inilinya ng nabanggit na LGU sa Gender and Development o GAD Training at Family Day bilang bahagi ng pagdiriwang. Ni sa panaginip, ayokong isiping ang pondo para sa Marso, iginasta ng Setyembre-Oktubre.
At may tema-temahan pa kamo. ‘Sigaw ng Lingkod Bayani: Malasakit para sa Taumbayan, Kapwa Kawani, at Kalikasan'. Malasakit para sa taumbayan? Kung nasaan sa gawaing ito, ewan lang.
Biyahe din lang naman ang gusto, bakit hindi ninyo lagyan ng kabuluhan ang gawaing iyan. Kagaya nito…
“To see is to learn,” ayon kay Mayor Bonifacio Emmanuel Alejandrino ng Arayat, Pampangga matapos hikayatin ang ibang mga LGU sa bansa na pumasyal sa kanilang bayan at kapulutan ng mahalagang impormasyon ang pagbisita sa dalawang laboratoryo ng shabu na agad nilang kinonvert bilang “crime tourism site.”
Ayon kay Alejandrino na dating pinuno ng Hukbalahap o Hukbong Mapagpalaya ng Bayan na siyang military arm ng dating Communist Party of the Philippines, hindi madi-detect ng kahit na sinong lokal na opisyal o kawani ang mga shabu lab upang agarang maireport sa mga kinauukulan kung hindi nila alam ang itsura ng mga ito.
Umaasa din ang alkalde na mula sa pagbisita ng ibang LGU ay magamit nila ang bagong kaalaman hinggil dito sa kanilang pakikipagtulungan sa kampanya ng pamahalaan laban sa iligal na droga.
Yan! Ganyan! Hindi kagaya ng nakagawiang “team-building kuno” at “Lakbay-aral kuno” na sa totoo naman ay pawang lasingan, lamyerda, at “junket” lang naman para sa mga kaalyado, at premyo para sa mga loyalistang kawani na noong halalan ay “naasahan.” Lagyan naman ninyo ng “aral” ang “lakbay” upang may maibalik na serbisyo sa bayan ninyong pinaglilingkuran. . Tandaan: Man is a political animal! (Twitter: follow@dspyrey)
