Itinanggi ng mga opisyal ng bayan ng Odiongan na sina Vice Mayor Mark Anthony Reyes at Sanguniang Bayan member Virgie Maulion ang mga paratang sa disqualification protest ni Alcantara Sanguniang Bayan Member Jose Luis Morales na ipinasa niya sa Provincial Office ng Department of Interior and Local Government.
Base sa petition, nakialam umano sa botahan sa pamamagitan ng indirect campaigning si Odiongan Vice Mayor Mark Anthony Reyes na kung saan taga-suporta umano ng kanyang tiyuhin na si SB Virgie Maulion. Isa rin umanong kaduda-duda o may ‘bad faith o malice' ang pagpapatawag ng Vice Mayor League Meeting ni Vice Mayor Reyes na itinaon mismo umano sa petsa at sa bayan na pagdadausan ng event ng PCL-Romblon.
Ayon kay Vice Mayor Reyes, hindi naman umano masama ang ikampanya niya ang kanyang tuyihin na si SB Virgie Maulion para sa pagka-Presidente ng Philippine Councilors League Romblon Chapter dahil wala naman umanong batas ang pumipigil rito at karapatan niya rin umano ito bilang isang tax payer.
“If he can show me any letter of the law that prohibits me from saying that, ‘My Sanguniang Bayan member is better than him, I will shut my mouth'. I don't see any reason,” pahayag ni Vice Mayor Reyes
Hindi rin lamang umano sariling desisyon niya na sa Romblon, Romblon gaganapin ang Vice Mayor League Meeting. Desisyon umano ito ng karamihan sa mga Vice Mayors.
“So, anong problema kung nandun kami?,” ani ni Vice Mayor Reyes.
Nang tanungin ng Romblon News Network si Vice Mayor Reyes kung alam niya ang issue kaugnay sa di umanoy vote buying bago man mangyari ang PCL Election, sinabi niya lamang na labas na umano siya rito.
“Sir, labas ako dun, I'm only telling other SB members na nagtatanung sa akin na ‘kandidato pala si konsehal Maulion?', ay ‘Oo magaling yung konsehal ko',” pahayag ni Reyes.
PCL-Romblon Chapter President at Odiongan SB member Virgie Maulion, itinanggi rin ang mga paratang
Sa hiwalay na interview ng Romblon News Network kay PCL-Romblon Chapter President at Odiongan SB member Virgie Maulion, sinigundahan niya rin si Vice Mayor Reyes na wala naman umanong batas na pumipigil sa Vice Mayor para ikampanya siya.
Hindi na rin umano papatulan ni SB Maulion ang mga ito hanggat hindi naman siya ipinapatawag ng DILG o ng korte.
