Pinalalakas ng Layag Cultural Minority School sa bayan ng San Fernando ang pakikipagtulungan nito sa mga pribadong organisasyon upang mapabuti ang pasilidad at kapaligiran sa pag-aaral ng mga katutubong mag-aaral sa pamamagitan ng bagong kasunduan sa Saint Vincent Ferrer Parish Multipurpose Cooperative (SVFPMPC) at isang partner supplier.
Nilagdaan ng paaralan, SVFPMPC at partner supplier ang isang Memorandum of Agreement (MOA) para sa pagbibigay ng pinansyal at materyal na tulong na gagamitin sa mga pangangailangan at improvement initiatives ng paaralan.
Matatagpuan ang Layag Cultural Minority School sa Sitio Layag, Barangay Taclobo, San Fernando, Sibuyan Island. Isa itong last-mile school na nagsisilbi sa mga mag-aaral mula sa Indigenous Peoples (IP) community.
Ito na ang ikalawang pagkakataon na nagpaabot ng tulong ang SVFPMPC sa paaralan at sa komunidad nito.
Bahagi ang partnership ng patuloy na pagsisikap ng paaralan na mapabuti ang learning environment at maisulong ang de-kalidad, inklusibo at culturally responsive na edukasyon para sa mga katutubong mag-aaral.
Nakaayon din ang kasunduan sa School Improvement Plan ng paaralan at sa K to 12 Partnerships framework ng Department of Education (DepEd), na nagbibigay-diin sa pakikipagtulungan sa mga pribadong organisasyon at iba pang stakeholder para sa kapakanan ng mga mag-aaral.
Kinilala naman ng paaralan ang suporta nina Public Schools District Supervisor Dr. Sarah Jane Avanzado at Schools Division Superintendent Roger Capa sa mga inisyatibo nito.
Nagpaabot din ng pasasalamat ang paaralan sa pamunuan ng SVFPMPC, kabilang ang general manager, Board of Directors, Sibuyan Branch Manager Amor Murchante at Internal Auditor Lalyn Gara, sa patuloy na suporta sa paaralan at komunidad.
Inaasahang makatutulong ang partnership sa pagpapabuti ng mga kondisyon sa pag-aaral at pagbibigay ng mas maayos na oportunidad sa mga IP learners ng Layag Cultural Minority School.


























