Naghain ng Verified Administrative Complaint sa Sangguniang Panlalawigan ng Romblon ang ilang residente ng San Fernando, Sibuyan Island, kaugnay ng naging proseso ng Sangguniang Bayan ng San Fernando sa pag-endorso sa Altai Philippines Mining Corporation (APMC).
Personal na naghain ng reklamo si Vivien Rios Carmona noong September 24, 2026, sa ngalan ng grupo.
Kabilang sa mga complainant sina Alfreo B. Pascual, Elmor A. Borda, Priscilla R. Rey, Veronica R. Batan at Carmona. Inihain ang reklamo laban sa anim na elective officials ng Municipality of San Fernando.
Nakatuon ang reklamo sa mga usaping administratibo na may kaugnayan sa Local Government Code at sa legislative proceedings na humantong sa pagpapatibay ng Resolution No. 297, Series of 2026, na nagbigay ng municipal endorsement sa APMC.
Kabilang sa mga isyung nais ipasuri ng mga complainant ang pagsunod sa legislative procedure at sa Internal Rules of Procedure ng Sangguniang Bayan, mga opisyal na rekord ng proceedings, at ang indibidwal na pagganap ng mga opisyal sa kanilang mga tungkulin.
Binigyang-diin din ng mga naghain ng reklamo na hindi nila itinuturing na sapat na batayan ng administrative liability ang pagkakaroon lamang ng pagkakaiba sa pananaw sa politika o polisiya.
Sa legislative history ng usapin, kalaunan ay pinagtibay ng Sangguniang Bayan ang Resolution No. 311, Series of 2026, noong August 3, na nag-recall at nag-withdraw sa Resolution No. 297 at sa municipal endorsement na dating ibinigay sa APMC. Ang naturang withdrawal ay isinama ng mga complainant bilang bahagi ng factual record at hindi umano itinuturing, sa sarili nito, bilang patunay ng administrative liability.
Ayon kay Carmona, layunin ng paghahain ng reklamo na gamitin ang mga mekanismong itinakda ng batas upang masuri ang mga katanungan hinggil sa paggamit ng kapangyarihang pampubliko.
“We filed this complaint because citizens have both the right and the responsibility to seek accountability through the institutions and processes provided by law,” ani Carmona.
Hiniling ng mga complainant sa Sangguniang Panlalawigan na tanggapin at imbestigahan ang reklamo alinsunod sa mga proseso sa ilalim ng Local Government Code. Hiniling din nila ang preservation at production ng mga kaugnay na opisyal na rekord upang makatulong sa pag-alam sa mga pangyayari sa likod ng naging proceedings.
Binigyang-diin ng grupo na may karapatan sa administrative due process ang lahat ng respondent at anumang pananagutan ay dapat ibatay sa ebidensya at tukuyin nang paisa-isa matapos mabigyan ng pagkakataong marinig ang lahat ng panig.
Ang reklamo ay hiwalay sa naunang naging aksyon ng Sangguniang Bayan na nag-withdraw sa municipal endorsement para sa APMC. Iniulat noong August 3 na binawi ng konseho ang Resolution No. 297 sa botong 4-2.
Sa ngayon, hinihiling ng mga complainant na hayaang umusad ang administrative process sa Sangguniang Panlalawigan at doon resolbahin ang mga isyung nakapaloob sa reklamo alinsunod sa batas.
Discussion about this post