Tatlong indibidwal ang naaresto sa magkahiwalay na buy-bust operation ng San Agustin Municipal Police Station (MPS) laban sa umano’y ilegal na pagbebenta at pamamahagi ng LPG products sa bayan noong September 12, 2026.
Isang 32-anyos na babae ang naaresto sa Barangay Cabolutan matapos matagumpay na makabili ang isang operatiba na nagsilbing poseur-buyer ng isang 11-kilogram Petron Gasul LPG cylinder.
Sa kasunod na pag-inspeksyon, tatlo pang Petron Gasul LPG cylinders ang nakita umano sa loob ng bahay, dahilan upang umabot sa apat ang kabuuang LPG cylinders na nasamsam sa naturang insidente.
Samantala, dalawang indibidwal naman ang naaresto sa isang gasolinahan sa Barangay Cagbo-aya matapos makatanggap ang pulisya ng pormal na reklamo hinggil sa umano’y pagbebenta at pamamahagi ng Petron Gasul LPG products nang walang kaukulang awtorisasyon.
Isa sa mga naaresto ay umano’y caretaker ng establisimyento.
Sa isinagawang inspeksyon, nakita umano sa plain view ang 12 karagdagang LPG cylinders sa loob ng establisimyento na isinailalim sa wastong pagkumpiska at imbentaryo.
Sa kabuuan, tatlong indibidwal ang naaresto at 17 Petron Gasul LPG cylinders ang nasamsam sa mga operasyon ng San Agustin MPS.
Pinangunahan ni PCPT Ricky F. Fran II, Officer-in-Charge ng San Agustin MPS, ang mga operasyon.
“Hindi lamang ito tungkol sa pagpapatupad ng batas, kundi tungkol sa pagprotekta sa ating mga mamimili at pagtiyak na ang mga produktong ginagamit ng ating mga kababayan ay lehitimo, awtorisado, at ligtas,” pahayag ni Fran.
Nahaharap ang mga naarestong indibidwal sa kaukulang kaso dahil sa umano’y paglabag sa Section 168.3(a), o Unfair Competition, ng Republic Act No. 8293 o Intellectual Property Code of the Philippines, at Section 2(a) ng Batas Pambansa Blg. 33, na inamyendahan ng Presidential Decree No. 1865, kaugnay ng ilegal na pangangalakal ng petroleum products, depende sa resulta ng imbestigasyon at pagsusuri ng mga kinauukulang awtoridad.
Isinailalim sa wastong inventory at dokumentasyon ang mga nakumpiskang LPG cylinders, marked money at iba pang kaugnay na ebidensya alinsunod sa umiiral na mga pamamaraan.
Dinala ang mga naarestong indibidwal sa San Agustin MPS para sa dokumentasyon at kaukulang disposisyon.
Muling hinimok ng San Agustin MPS ang publiko na maging mapagmatyag sa pagbili ng LPG products at agad iulat sa pulisya o kinauukulang awtoridad ang anumang kahina-hinalang pagbebenta o pamamahagi ng petroleum products.
Discussion about this post