Naghain nitong September 9 ang mga mambabatas mula sa Makabayan bloc ng resolusyon na humihiling ng imbestigasyon sa House Committee on Natural Resources kaugnay ng operasyon ng Altai Philippines Mining Company (APMC) sa Sibuyan Island, Romblon.
Layunin ng panukala na siyasatin ang mga usapin kaugnay ng umano’y militarisasyon sa lugar at kawalan umano ng sapat na konsultasyon at pahintulot mula sa mga residenteng maaaring maapektuhan ng operasyon ng pagmimina.
Hiniling din sa resolusyon na ipatawag ang kaukulang pagdinig upang talakayin ang mga ulat ng presensya ng pulisya sa mining site at umano’y paggamit ng “excessive and unnecessary force” laban sa mga residente at indigenous peoples na nagsasagawa ng mapayapang pagtitipon, protesta at pagtatanggol sa kanilang mga lupain.
Nais ding tingnan ng Makabayan bloc ang mga pangyayari kaugnay ng mga court actions na may kinalaman sa operasyon ng pagmimina sa Sibuyan.
Ayon kay Gabriela Women’s Party Rep. Sarah Elago, mahalagang matugunan ang mga kakulangan sa pagsasagawa ng tunay na konsultasyon sa mga residente at mga taong posibleng maapektuhan ng proyekto, gayundin ang mga usapin sa environmental at procedural safeguards.
Kapag inaprubahan ang resolusyon, hihikayatin din ng Kamara ang Department of Environment and Natural Resources (DENR) na agad na suspindihin ang mga aktibidad na may kaugnayan sa mining project hanggang sa makuha ang tunay na pahintulot ng mga apektadong komunidad.
Samantala, sinabi ni Kabataan Party-List Rep. Renee Co na nagbabala umano ang mga siyentista tungkol sa posibleng epekto ng large-scale mining sa Sibuyan Island, kabilang ang epekto nito sa mga residente, biodiversity, paraan ng pamumuhay at turismo ng isla.
Iginiit ng mga mambabatas na layunin ng kanilang panukala na siyasatin kung kaninong interes napoprotektahan sa gitna ng operasyon ng malakihang pagmimina—ang kapakanan ng komunidad at bansa o ang interes ng iilang kumikita mula rito.
Ang naturang resolusyon ay panukala pa lamang at mangangailangan ng kaukulang proseso at pagtalakay sa Kamara bago ito tuluyang maipatupad.
