Itinalaga ni Pangulong Ferdinand R. Marcos Jr. si Dr. Edwin Mercado bilang bagong kalihim ng Department of Health (DOH), kapalit ni Dr. Jose “Brix” Pujalte Jr., na nagbitiw sa puwesto dahil sa mga kadahilanang pangkalusugan.
Si Mercado ay nagsilbing acting President at Chief Executive Officer ng Philippine Health Insurance Corporation (PhilHealth) bago italaga bilang kalihim ng DOH. Naitalaga siya bilang pinuno ng PhilHealth noong Pebrero 2025.
Daladala ni Mercado sa DOH ang mahigit tatlong dekadang karanasan sa healthcare management, health financing at universal health care. Bago siya pumasok sa PhilHealth, humawak siya ng iba't ibang posisyon sa sektor ng kalusugan, kabilang ang pagiging medical director at president at CEO ng ilang ospital.
Naging consultant din siya ng Asian Development Bank at Zuellig Family Foundation, at naging bahagi ng Strategic Advisory Group ng DOH para sa pagpapatupad ng Universal Health Care.
Nagtapos si Mercado ng Doctor of Medicine sa University of the Philippines Manila, at kumuha ng advanced studies sa Global Health Delivery sa Harvard Medical School at Hospital Administration sa University of North Carolina–Chapel Hill.
Samantala, itinalaga naman ni Marcos si Dr. Beverly Lorraine Ho bilang bagong President at Chief Executive Officer ng PhilHealth, kapalit ni Mercado. Si Ho ay dating opisyal ng DOH.
Ang magkahiwalay na appointment ay inanunsyo ng Malacañang nitong Lunes, Agosto 10.
Discussion about this post