Tiniyak ng Malacañang na ang mga ayuda at proyektong ipinapatupad sa ilalim ng Local Government Support Fund (LGSF) ay ipinagkakaloob sa lahat ng lokal na pamahalaan sa bansa, anuman ang kanilang political affiliation.
Sa isang Palace press briefing, sinabi ni Presidential Communications Office Undersecretary at Palace Press Officer Claire Castro na maging si Naga City Mayor Leni Robredo ay kinumpirma umanong walang pinipiling lugar o kulay ang pamamahagi ng LGSF.
“Ito po ay nabanggit din ni Mayor Leni Robredo ng Naga City na siya mismo ang nakakita at isa siya sa testigo na magsasabi na ang LGSF ay pangkalahatan, walang pinipiling kulay ito, walang pinipiling bayan, walang pinipiling lugar. Lahat ng barangay, lahat ng local government units ay mabibiyayaan ng LGSF,” ani Castro.
Hinikayat din ng Palasyo ang mga benepisyaryo na makipag-ugnayan sa kanilang mga lokal na opisyal kaugnay ng pamamahagi ng 10-kilong bigas sa ilalim ng programa.
Nagbabala rin si Castro sa mga lokal na opisyal laban sa anumang uri ng pang-aabuso sa implementasyon ng LGSF, kasunod ng mga ulat na may ilang benepisyaryo ang nakatanggap umano ng bigas na kulang sa itinakdang timbang.
“Kapag may ganyan na nangyari, ipagbigay-alam niyo lang sa amin dahil kami mismo ang magka-call out, sisita sa mga ganitong klaseng pananamantala,” aniya.
Binigyang-diin din niya na walang anumang bayad ang pagtanggap ng ayuda mula sa pamahalaan.
“Kapag kayo ay sinabihan na kailangan magbayad kayo para makatanggap ng ayuda mula sa pamahalaan, wala pong bayad ni singko, so huwag po kayo magpapaloko,” dagdag ni Castro.
Ayon sa Palasyo, ang programa ay nagbibigay ng 10 kilo ng bigas kada dalawang buwan sa mga kwalipikadong benepisyaryo mula sa mga vulnerable sector, kabilang ang mga low-income earners, senior citizens, at solo parents.
Nauna nang sinabi ni Pangulong Ferdinand R. Marcos Jr. na 1,276 sa halos 2,000 lokal na pamahalaan sa buong bansa ang nakatanggap na ng tulong sa ilalim ng LGSF.
