Ipinaalala ng Philippine Health Insurance Corporation (PhilHealth) sa publiko ang mga benepisyong maaaring ma-avail ng mga miyembro para sa limang pangunahing sanhi ng pagkamatay sa Pilipinas, batay sa datos ng Philippine Statistics Authority (PSA).
Kabilang sa mga sakit na saklaw ng mga benepisyo ang ischaemic heart disease, neoplasm o cancer, cerebrovascular disease o stroke, pneumonia, at diabetes mellitus.
Para sa mga pasyenteng may ischaemic heart disease, maaaring umabot sa ₱523,853 ang benepisyo para sa Percutaneous Coronary Intervention (PCI). Saklaw din ang fibrinolysis na may ₱133,500, emergency medical services na ₱21,900, at cardiac rehabilitation na ₱66,140.
Samantala, para sa neoplasm o tumor, maaaring makatanggap ng ₱15,015 hanggang ₱28,860 ang mga benign cases at ₱40,911 hanggang ₱73,710 ang mga malignant o cancer cases.
May benepisyo rin para sa iba pang pangunahing sakit. Ang mga pasyenteng may cerebrovascular disease o stroke ay maaaring makatanggap ng ₱20,085 hanggang ₱29,640, habang ₱12,870 hanggang ₱29,250 naman para sa pneumonia at ₱18,135 hanggang ₱30,810 para sa diabetes mellitus.
Hinikayat din ng PhilHealth ang mga miyembro na magpakonsulta sa mga PhilHealth YAKAP Clinics, na nagbibigay ng primary care at tamang gabay upang maagapan at mapangasiwaan ang iba't ibang karamdaman.
Ayon sa PhilHealth, bahagi ang mga benepisyong ito ng patuloy na pagpapatibay ng Universal Health Care program upang mabawasan ang gastusing medikal ng mga Pilipino at mapalawak ang access sa kinakailangang serbisyong pangkalusugan.
