Makararanas ang lalawigan ng Romblon ng maulap na kalangitan na may kalat-kalat na pag-ulan at thunderstorms ngayong Huwebes dahil sa trough o extension ng Tropical Depression Kiyapo, ayon sa Philippine Atmospheric, Geophysical and Astronomical Services Administration (PAGASA).
Sa weather bulletin ng PAGASA na inilabas alas-5:00 ng madaling araw, sinabi nitong kasama ang Romblon, Bicol Region, at Eastern Visayas sa mga lugar na maaapektuhan ng trough ng bagyo.
Nagbabala ang state weather bureau sa posibilidad ng flash floods at pagguho ng lupa, lalo na sa mga lugar na makakaranas ng katamtaman hanggang sa malakas na pag-ulan.
Bandang alas-5:00 ng umaga, namataan ang sentro ng Tropical Depression Kiyapo sa layong 950 kilometro silangan ng Central Luzon. Taglay nito ang lakas ng hanging aabot sa 45 kilometro kada oras malapit sa gitna at pagbugsong hanggang 55 kilometro kada oras, habang kumikilos pakanluran-hilagang-kanluran sa bilis na 20 kilometro kada oras.
Samantala, itinaas ng PAGASA ang Tropical Cyclone Wind Signal No. 1 sa ilang bahagi ng Batanes, Cagayan, Babuyan Islands, Isabela, Apayao, Abra, Kalinga, Mountain Province, Ifugao, Ilocos Norte, at Ilocos Sur.
Sa forecast track ng PAGASA, posibleng lumapit o mag-landfall ang Bagyong Kiyapo sa lalawigan ng Cagayan sa pagitan ng Biyernes at Sabado, Hulyo 25.
Pinapayuhan ng PAGASA ang mga residente ng Romblon na patuloy na subaybayan ang mga susunod na weather advisories at maging alerto sa posibleng pagbaha at pagguho ng lupa dulot ng malalakas na pag-ulan.
Discussion about this post