Labingwalong Persons Deprived of Liberty (PDL) ng Bureau of Jail Management and Penology (BJMP) – Odiongan District Jail ang nagtapos sa Alternative Learning System (ALS) ng Department of Education (DepEd) noong Hulyo 18, bilang bahagi ng patuloy na programa ng pamahalaan para sa rehabilitasyon sa pamamagitan ng edukasyon.
Isinagawa ang ALS Graduation and Moving-Up Ceremony sa Odiongan South Central Elementary School na may temang, “Pilipinong Nagsipagtapos: Handang Mamuno nang may Kakayahan at Mabuting Pagkatao.”
Sa kabuuang bilang ng mga nagtapos, anim ang nakatapos ng antas elementarya habang labindalawa ang nagtapos ng Junior High School.
Ayon sa BJMP, ipinakikita ng programa na ang edukasyon ay nananatiling mahalagang instrumento sa pagbabago ng buhay ng mga PDL at sa paghahanda sa kanila para sa maayos na pagbabalik sa komunidad bilang mga responsableng mamamayan.
Dinaluhan ang seremonya ng mga magulang ng mga PDL, mga kinatawan ng DepEd–Alternative Learning System (ALS), mga opisyal ng barangay, mga panauhing pandangal, at mga tauhan ng BJMP bilang pagpapakita ng suporta sa rehabilitasyon at pagbibigay ng pangalawang pagkakataon sa mga PDL.
Samantala, isang ALS learner ang ginawaran bilang Outstanding ALS Learner matapos magpakita ng natatanging kahusayan sa akademiko, pamumuno, at dedikasyon sa pag-aaral.
Isinagawa ang programa sa ilalim ng pamumuno ni JSINSP Rowena F. Olivar, Acting District Jail Warden ng Odiongan District Jail, at sa paggabay ni JSSUPT Deogracias F. De Castillo, Regional Director ng BJMP MIMAROPA, bilang bahagi ng layunin ng ahensya na palakasin ang mga programang nakatuon sa repormasyon, pagpapaunlad ng pagkatao, at pagbibigay ng makabuluhang pangalawang pagkakataon sa mga Persons Deprived of Liberty.
