Itinampok noong Lunes ang mga produktong yari ng mga persons deprived of liberty (PDLs) ng Bureau of Jail Management and Penology (BJMP) Odiongan District Jail sa One Town One Product (OTOP) Hub ng Odiongan Negosyo Center bilang bahagi ng mga programang pangkabuhayan at rehabilitasyon para sa mga nasa kustodiya ng ahensya.
Isinagawa ang product showcase sa pakikipagtulungan ng Department of Trade and Industry (DTI) sa ilalim ng programang One Town, One Product (OTOP), kung saan ipinakita ang iba't ibang produktong ginawa ng mga PDL na sumasalamin sa kanilang natamong kasanayan habang sumasailalim sa rehabilitasyon.
Pinangasiwaan ang aktibidad sa ilalim ng pamumuno ni Acting District Jail Warden Senior Inspector Rowena Olivar.
Ayon kay Olivar, layunin ng programa na mabigyan ang mga PDL ng pagkakataong mapaunlad ang kanilang kakayahan at magkaroon ng pagkakakitaan bilang paghahanda sa kanilang muling pagbabalik sa komunidad.
Sinabi naman ni BJMP MIMAROPA spokesperson JO3 Joefrie Anglo na kabilang ang mga livelihood-based intervention sa mga programang isinusulong ng ahensya upang suportahan ang rehabilitasyon ng mga PDL at mabawasan ang posibilidad ng muling pagkakasangkot sa paglabag sa batas.
Ayon sa BJMP, patuloy ang pakikipagtulungan nito sa mga ahensya tulad ng DTI upang palawakin ang mga programang nakatuon sa paglinang ng kasanayan, pagtataguyod ng kabuhayan, at paghahanda sa mga PDL para sa kanilang pagbabalik sa lipunan.
