Nagsagawa ang Department of Agrarian Reform (DAR) Provincial Office ng Romblon ng isang cascading activity hinggil sa Land Use Conversion Exemption upang mapalawak ang kaalaman ng mga partner stakeholders sa mga polisiya at alituntunin kaugnay ng paggamit ng lupa.
Idinaos ang aktibidad sa bayan ng Odiongan at dinaluhan ng mga kawani ng DAR, Municipal Planning and Development Coordinators (MPDCs), Municipal Assessors, at iba pang kinatawan ng mga lokal na pamahalaan sa lalawigan.
Sa kanyang mensahe, binigyang-diin ni Rogelio D. Madarcos, na kumatawan kay Sharon Terrie P. Balagot, ang kahalagahan ng wastong pagpapatupad ng mga polisiya sa paggamit ng lupa upang mapanatili ang balanse sa pagitan ng kaunlaran at pangangalaga sa mga lupang agrikultural.
Naging resource speaker ng aktibidad si Reparado B. Galos III na tinalakay ang mga alituntunin ng DAR kaugnay ng Comprehensive Agrarian Reform Program (CARP) Exemption at mga patakaran sa Land Use Conversion.
Kabilang sa mga natalakay ang mga legal at teknikal na aspeto ng pagsusuri sa mga aplikasyon para sa exemption, gayundin ang mga proseso at rekisitos na dapat sundin sa ilalim ng umiiral na mga batas at regulasyon.
Nagkaroon din ng open forum at question-and-answer segment kung saan nagbigay ng mga katanungan at paglilinaw ang mga kalahok hinggil sa mga usaping may kaugnayan sa land use conversion at agrarian reform policies.
Ayon sa DAR, bahagi ang aktibidad ng patuloy nitong pagsisikap na mapanatiling updated ang mga kawani at partner stakeholders sa mga kasalukuyang polisiya at alituntunin kaugnay ng repormang agraryo at paggamit ng lupa.
