Papasok na sa bayan ng Odiongan ang kauna-unahang call center sa lalawigan sa pamamagitan ng ZenXtelecom, isang kompanyang nagmula sa Iloilo.
Inaasahang magiging opisina ng kumpanya ang itatayong Eastgate Building sa Barangay Dapawan, na magsisilbing sentro ng operasyon nito sa Romblon.
Ayon sa panayam ng Romblon News Network sa mga kinatawan ng Eastgate Building, tinatayang makapagbibigay ito ng humigit-kumulang 100 trabaho para sa mga Romblomanon bilang call center agents sa oras na magsimula ang operasyon.
Bukod sa opisina ng ZenXtelecom, magkakaroon din ng 11 commercial units ang Eastgate Building na maaaring okupahan ng iba pang negosyo sa lugar.
Inaasahang makatutulong ang proyekto sa pagpapalawak ng oportunidad sa trabaho at pagpasok ng bagong industriya sa lalawigan, partikular sa sektor ng business process outsourcing.
