Nagsagawa ng miting de avance ang Team Botika sa Romblon Public Plaza ngayong Mayo 10, huling araw ng campaign period. Pinangunahan ito nina Congressman Eleandro “Budoy” Madrona, Governor Jose “Otik” Riano, at Vice Governor Armando “Arming” Gutierrez.
Dumalo ang mga tagasuporta mula sa iba’t ibang barangay ng munisipyo upang saksihan ang pagtitipon ng mga kandidatong kasalukuyang nanunungkulan at naghahangad ng panibagong termino, gayundin ang mga bagong tumatakbo sa lokal na pamahalaan.
Sa magkakahiwalay na talumpati, tinalakay ng tatlong pangunahing opisyal ang ilang isyung ibinabato sa kanila.
Nagbigay din ng pahayag si Cong. Madrona ukol sa ilang kampanyang pangako ng ibang kandidato.
“Hindi na kita magpadaya-daya sa maayu-ayu ninda na promisa, pero ano ang kamatuuran? naubra na tanan ina ng atun pinalangga na gobernador,” aniya.
Tinalakay rin ng mga kandidato ang mga programa ng kanilang administrasyon na may kaugnayan sa imprastruktura, kalusugan, turismo, kabuhayan, at iba pang pangunahing serbisyo.
“Ang target natin ay sa susunod na tatlong taon o apat na taon, ay maging first class province ang Romblon,” pahayag ni Gov. Riano.
Kasama ring humarap sa publiko ang iba pang kandidato ng Team Botika mula sa sangguniang panlalawigan, mayor at vice mayor, hanggang sa mga tumatakbo sa sangguniang bayan ng Romblon.
