Isang malaking tagumpay ang nakuha ng Futsal Men’s Team ng Region 4, na karamihan ay binubuo ng mga student-athletes mula sa Romblon State University (RSU). Nagtapos sila sa 2nd place at nakuha ang Silver Medal sa katatapos na National State Colleges and Universities Athletic Association (SCUAA) Meet 2025, na ginanap sa Camiguin mula April 23 – 27, 2025.
Sa tamang paggabay at pangunguna ni Head Coach Dave John Gamol, ang Region 4/RSU team, na binubuo nina Jomel Garachico, Matthew Delos Reyes, Josiah Francisco, Joseph Araque, Alvin John Araque, Rainiere Fernando, John Ralph Recto, Noeva Moaje, Jef Martinez, at Edgar Tumanon II, kasama ang kanilang mga reinforcement mula sa University of the Philippines Los Baños (UPLB) na sina Kurt Aaron Austria at Austin Christian Saito, ay unang humarap at tinalo ang Region 2 via forfeit dahil hindi sumipot ang kalaban sa venue.
Sa kanilang pangalawang laban, nakaharap nila ang Region 7 at nagtapos ito sa 3-3 draw. Sa kanilang pangatlong laro, nakaharap nila ang NCR, kung saan ito na rin ang naging championship game. Kung mananalo ang Region 4, sila na ang magiging champion ng tournament, ngunit kung matatalo sila, kailangan lamang hindi umabot sa 9 goal difference upang mapanatili ang kanilang 2nd place, habang ang Region 7 ay magiging 3rd. Kung umabot naman sa 9 goal difference, ang Region 7 na ang magiging 2nd place.
Sa kabila ng matinding laban, nagtapos ang laro na 4-1 pabor sa NCR, na siya ngang itinanghal na kampeon. Bagamat natalo sa championship game, hindi basta-basta ibinigay ng Region 4 ang panalo sa NCR. Isang malaking impact para sa team ang naitalang goal ni John Ralph Recto sa finals, na nagsilbing pagpapahiwatig ng kanilang determinasyon at paghahanda na bumalik na mas malakas, mas handa, at mas may karanasan sa susunod na National SCUAA Meet.
Halos buo pa rin ang kanilang team at tatlong players lamang ang mawawala dahil magtatapos na sila ng kolehiyo. Sila ay sina Jomel Garachico at Josiah Francisco, na parehong may kursong Bachelor of Physical Education, at si Matthew Delos Reyes, na may kursong BSIT. Umaasa ang tatlong graduating student na magpapatuloy ang winning ways ng kanilang eskwelahan at ang mga papalit sa kanila ay magbibigay ng parehong dedikasyon at intensity sa bawat laro.
Samantala, isang mensahe ng pasasalamat ang ipinahayag ni Coach Dave John Gamol sa lahat ng kanyang mga manlalaro at sa buong RSU Community. Ayon sa kanya, “Congratulations sa lahat ng members ng team for giving their best to represent your school and your region. To the players with remaining years to play, this serves as an inspiration to aim much higher. I am very proud of the boys for giving their best even though our preparation was short, unlike other teams that are part of their schools' varsity program. I am also thankful to the RSU Administration for the support they gave us and to everyone who extended their support to the team.”
Maging kami sa Romblon News Network ay nais magbigay ng pagbati at congratulations sa inyong nakamit na tagumpay.
