Naaresto nito lamang August 26 ng mga tauhan ng San Fernando Municipal Police Station sa pangunguna ni Police Senior Inspector Elmer Fajel sa pakikipagtulungan na rin ng Cajidiocan Municipal Police Station, ang No.6 Most Wanted Person ng bayan ng Cajidiocan na si Erwin Roñon Roda, alyas Boknoy.
Dinakip si Boknoy sa isang tindahan sa Aurora St. Poblacion, San Fernando, Romblon sa bisa ng warrant of arrest na inilabas ni Judge Ramiro Geronimo ng Regional Trial Court Branch 81 noong nakaraang taon dahil sa kasong murder.
Ayon sa Cajidiocan MPS, taong 2014 umano ng may mangyaring krimen sa bayan ng Cajidiocan na kung saan pinatay ang karelasyon ng ate ni Roda at ang itinurong suspek ng lumutang na witness ay si Erwin.
Dinala na si Roda sa Romblon Provincial Jail sa Barangay Capaclan, Romblon, Romblon at doon ikukulong habang umuusad ang kaso.
