Binawi ng Sangguniang Bayan ng San Fernando ang nauna nitong pag-endorso sa operasyon ng Altai Philippines Mining Corporation (APMC) sa Barangay España matapos aprubahan ang isang resolusyon na nagre-recall at nagwi-withdraw sa Municipal Resolution No. 297, Series of 2026 sa isinagawang espesyal na sesyon nitong Lunes.
Pinagtibay ang resolusyon sa botong 4-2, kung saan bumoto pabor sina SK Federation President Jaylar Relox at mga konsehal na sina Frankie Romano, Daxie Benedict R. Rios, at Maritess R. Clavel. Tumutol naman sina Sangguniang Bayan Members Dante Marin at Cynthia Rios.
Pinangunahan ang sesyon ni Presiding Officer Pro Tempore Cedmark Francis R. Renion, matapos bumuo ng quorum ang anim na dumalong miyembro ng Sangguniang Bayan.
Isinailalim sa agarang pagtalakay ang panukala matapos itong sertipikahang urgent ni Mayor Fernando U. Marin. Sa kanyang Certification of Urgency, sinabi ng alkalde na kinakailangang agad na matugunan ang mga isyung may kaugnayan sa procedural infirmities sa pagpapatibay ng Resolution No. 297, gayundin ang lumalalang usapin sa kapayapaan, kaayusan, at kaligtasan ng publiko kasunod ng serye ng mga mapayapang protesta, prayer brigade, at noise barrage na isinagawa ng iba't ibang sektor ng mamamayan mula pa noong Hulyo 17.
Sa ilalim ng bagong resolusyon, pormal na binawi ng Sangguniang Bayan ang paborableng pag-endorso nito sa aplikasyon ng APMC para sa operasyon nito sa ilalim ng Mineral Production Sharing Agreement (MPSA) sa Barangay España.
Inaatasan din ng resolusyon ang pagsasagawa ng mas malawak na public consultations, committee proceedings, Natural Capital Accounting alinsunod sa Republic Act No. 11995 o Philippine Ecosystem and Natural Capital Accounting System Act, ecosystem services valuation, comprehensive cost-benefit analysis, at iba pang scientific, environmental, social, at economic studies bago isaalang-alang ang anumang susunod na aksyon kaugnay ng proyekto.
Habang idinaraos ang sesyon, nanatiling mapayapa ang pagtitipon ng mga residente, environmental advocates, faith-based groups, at iba pang mamamayan sa labas ng lumang Gusaling Munisipyo. Nagsagawa sila ng panalangin at mapayapang pagbabantay bilang pagpapahayag ng kanilang paninindigan sa pangangalaga ng kalikasan at kinabukasan ng Sibuyan Island.
Inaasahang ipaaabot ng lokal na pamahalaan ang kopya ng resolusyon sa mga kinauukulang pambansang ahensya bilang bahagi ng kanilang pagrepaso sa mga permit, aplikasyon, at iba pang prosesong may kaugnayan sa operasyon ng Altai Philippines Mining Corporation sa Sibuyan Island.
Discussion about this post