Ipinamalas ng mga performing groups at student artists ng Romblon State University (RSU) ang kanilang talento sa musika, sayaw at sining sa isinagawang Regional Science and Technology Week (RSTW) 2026 Opening and Fellowship Night noong Agosto 17 sa La Marietta Events Place at University Quadrangle sa Odiongan.
Tampok sa programa ang mga pagtatanghal ng Yagting Kanugkog Chorale, Hiwas Dance Troupe at Rondalla Ensemble, na nagpakita ng mayamang tradisyon ng sining at kultura ng unibersidad at pagpapahalaga nito sa kulturang Filipino.
Naghandog din ng pagtatanghal ang mga vocal duet, instrumentalist na tumugtog ng violin at gitara, at mga vocal soloist na nagdagdag ng iba’t ibang himig at istilo sa programa.
Naging bahagi ng pagtatanghal ang mga klasikal, kontemporaryo at musikang Filipino, na nagbigay-buhay sa fellowship night at nagbuklod sa mga dumalo bilang bahagi ng pagdiriwang ng RSTW 2026.
Bukod sa science, technology and innovation, nagsilbi ring entablado ang pagdiriwang upang maipakita ang talento, kultura at artistikong kahusayan ng komunidad ng RSU.
Pinangunahan ang mga pagtatanghal ng mga talentong mula sa unibersidad sa ilalim ng Social and Cultural Affairs Office (SCAO).
Kabilang sa mga kinilala sa likod ng programa sina Rodnie Manzala, dance choreographer; Mel Andrew Garcia, Yagting Kanugkog Choirmaster; Christian James Tejolan, trainer ng Rondalla Ensemble; at Dr. John B. Fabello, director ng cultural event.
Ipinakita ng mga pagtatanghal ang patuloy na pagsisikap ng RSU na malinang hindi lamang ang akademiko at teknikal na kakayahan ng mga estudyante kundi maging ang kanilang talento sa sining at pagpapahalaga sa kultura.
Discussion about this post