Isang juvenile King Cobra ang isinuko ng Barangay Local Government Unit (BLGU) ng Danao Norte, Santa Fe, Romblon sa mga awtoridad upang matiyak ang ligtas at wastong pangangasiwa sa naturang wildlife.
Ayon sa Public Information Office (PIO) ng Santa Fe, unang dinala ang ahas sa Municipal Environment and Natural Resources Office (MENRO) bago ito isinailalim sa pangangalaga ng Provincial Environment and Natural Resources Office (PENRO) Romblon sa tulong ng Municipal Health Office (MHO) para sa kaukulang disposisyon at pagsusuri.
Kasunod nito, muling nagpaalala ang lokal na pamahalaan sa publiko na maging maingat matapos ding maiulat kamakailan ang mga umano'y King Cobra sightings sa mga barangay ng Pandan at Magsaysay.
Pinayuhan ang mga residente na maging mapagmatyag, lalo na sa mga lugar na may matataas na damo, masukal na paligid, at mga lugar na malapit sa kagubatan at bukirin, kung saan maaaring mamataan ang mga ahas.
Hinihikayat din ang publiko na huwag lapitan, hulihin, o saktan ang anumang wildlife na kanilang makikita. Sa halip, agad itong iulat sa DENR, MENRO, o sa kanilang lokal na pamahalaan upang matiyak ang kaligtasan ng komunidad at ang wastong pangangalaga sa mga ligaw na hayop.
