Pormal nang isinailalim sa urgent consideration ang panukalang resolusyon na naglalayong bawiin ang naunang pag-endorso ng Sangguniang Bayan ng San Fernando sa aplikasyon sa pagmimina ng Altai Philippines Mining Corporation (APMC) matapos itong sertipikahang urgent ni Municipal Mayor Fernando Marin.
Sa Certification of Urgency, sinabi ng alkalde na kinakailangang agarang aksyunan ng Sangguniang Bayan ang usapin dahil sa epekto nito sa public order, public safety, general welfare, at public confidence in local governance. Binanggit din sa sertipikasyon ang nagpapatuloy na mga prayer brigade, rally, at iba pang mapayapang pagpapahayag ng saloobin ng mga residente kasunod ng pagpasa ng Resolution No. 297, Series of 2026.
Layunin ng panukalang resolusyon na bawiin ang Resolution No. 297 at ang municipal endorsement na ibinigay sa APMC. Nakapaloob din dito ang panukalang magsagawa muna ng karagdagang public consultations, committee proceedings, Natural Capital Accounting alinsunod sa Republic Act No. 11995 o Philippine Ecosystem and Natural Capital Accounting System Act, ecosystem services valuation, comprehensive cost-benefit analysis, at iba pang scientific, technical, environmental, social, at economic studies bago gumawa ng anumang susunod na hakbang ukol sa pagmimina.
Sa kasalukuyan, nagpapatuloy ang sesyon ng Sangguniang Bayan sa Old Municipal Building at inaasahang mapag-uusapan ang nasabing resolusyon.
Samantala, nagsagawa naman ng mapayapang picket at prayer brigade sa labas ng gusali ang mga residente, environmental advocates, faith-based groups, at iba pang mamamayan bilang pagpapahayag ng kanilang paninindigan sa isyu ng pagmimina sa Sibuyan Island.
Discussion about this post