Patuloy na nakararanas ng pagbaha ang ilang kabahayan sa Sitio Mabinuligon, Barangay Poblacion, Alcantara, Romblon kasunod ng halos walang tigil na malakas na pag-ulan kahapon.
Ayon kay Argie Fronda, isang residente sa lugar, matagal nang problema ng mga nakatira sa sitio ang pagbaha tuwing may bagyo o matinding pag-ulan.
“Halos lahat po kami dito nakakaranas ng ganitong sitwasyon sa tuwing umuulan at bagyo. Matagal na po namin itong nararanasan dito,” kwento nito sa Romblon News Network.
Sinabi niyang nahihirapan ang mga residente sa tuwing tumataas ang tubig at hiniling sa mga kinauukulang tanggapan na makahanap ng permanenteng solusyon sa problema.
Kabilang sa mungkahi ng mga residente ang pagtatayo ng culvert upang makatulong sa maayos na daloy ng tubig at mabawasan ang pagbaha sa kanilang lugar.
Patuloy naman ang panawagan ng mga residente sa mga kinauukulang ahensya at lokal na pamahalaan na matugunan ang paulit-ulit na pagbaha na nakaaapekto sa kanilang mga kabahayan tuwing malakas ang pag-ulan.
Discussion about this post