Nakumpleto na ng Department of Public Works and Highways (DPWH) ang concreting ng 1.3-kilometrong Farm-to-Market Road (FMR) sa Barangay Agojo, Looc, Romblon, na inaasahang magpapabilis sa pagdadala ng mga produktong agrikultura at magpapabuti sa akses ng mga residente sa mahahalagang serbisyo.
Batay sa project overview, may 5 metrong lapad ang bagong kongkretong kalsada na nag-uugnay sa mga agricultural production areas at pangunahing lansangan. Layunin nitong mapababa ang gastos sa transportasyon, mabawasan ang post-harvest losses, at mapadali ang pagbiyahe ng mga magsasaka, mangingisda, at iba pang residente sa buong taon.
Ayon sa DPWH Romblon, mas mapapadali na ang pagdadala ng mga produktong tulad ng palay, niyog, root crops, gulay, at prutas mula sa Barangay Agojo patungo sa sentro ng bayan ng Looc at mga kalapit na pamilihan. Inaasahan ding mapapahusay nito ang akses sa mga paaralan, pasilidad pangkalusugan, at iba pang serbisyo ng pamahalaan.
Ibinahagi ng mga residente na malaking pagbabago ang naidulot ng proyekto sa kanilang komunidad.
Ayon kay Merlinda Garbin, naging maayos na ang pagpasok at paglabas ng mga sasakyan at hindi na nahihirapan ang kanyang mga apo sa pagpasok sa paaralan dahil sa maayos na kalsada.
Samantala, sinabi naman ni Shermi Sieva, may-ari ng isang tindahan sa barangay, na mas dumami ang mga bumibili sa kanilang lugar dahil naging mas madali ang pagpunta ng mga sasakyan at mamimili.
Nagpasalamat din ang mga residente sa DPWH sa pagpapatupad ng proyekto, na ayon sa kanila ay hindi lamang nagpabuti sa kalagayan ng kalsada kundi nagbigay rin ng mas ligtas na biyahe at mas magandang oportunidad para sa kabuhayan ng komunidad.
Ayon sa DPWH, bahagi ang proyekto ng patuloy nitong pagpapatupad ng mga imprastrakturang magpapalakas sa sektor ng agrikultura, magpapahusay sa konektibidad ng mga pamayanan, at magsusulong ng pangmatagalang pag-unlad sa mga kanayunan.
