Isang 63-anyos na babae ang nasapol ng isang tricycle sa Magdiwang, Romblon kagabi matapos umanong mawalan ng kontrol sa minamanehong sasakyan ang driver habang mabilis ang takbo nito sa isang palikong bahagi ng kalsada.
Naganap ang aksidente bandang alas-8 ng gabi noong Agosto 15 sa Jacinto Street, Barangay Poblacion, Magdiwang, at nakunan ng CCTV camera.
Agad na rumesponde ang mga tauhan ng Magdiwang Municipal Police Station (MPS) matapos makatanggap ng impormasyon hinggil sa aksidente.
Kaagad namang isinugod ang biktima sa pinakamalapit na klinika upang mabigyan ng paunang lunas at masuri ang kanyang kalagayan. Matapos mabigyan ng kinakailangang atensyong medikal, ligtas naman siyang nakauwi sa kanilang tahanan.
Patuloy ang imbestigasyon ng Magdiwang MPS upang matukoy ang buong pangyayari sa aksidente.
Ayon sa pulisya, kasalukuyan pang pinag-iisipan at pinagdedesisyunan ng biktima kung magsasampa ng kaukulang kaso laban sa nakabangga sa kanya.
Tiniyak naman ng Magdiwang MPS ang patuloy nitong suporta sa biktima at kahandaang magbigay ng kaukulang tulong at serbisyo sakaling kailanganin.
