Anim na kabahayan sa mga liblib na komunidad sa Tablas Island ang tumanggap ng 1,000-watt solar lighting systems mula sa Tablas Island Electric Cooperative, Inc. (TIELCO) sa ilalim ng Bahay-Liwanag at Kaligtasan Program.
Isinagawa ang programa bilang bahagi ng pagdiriwang ng ika-47 anibersaryo ng Philippine Rural Electric Cooperatives Association (PHILRECA).
Ayon sa TIELCO, layunin ng programa na mabigyan ng ligtas, maaasahan, at napapanatiling pinagkukunan ng kuryente ang mga pamilyang naninirahan sa mga liblib na lugar na wala pang access sa elektrisidad.
Sinabi ng kooperatiba na ang solar lighting systems ay magbibigay ng ilaw sa mga tahanan, makatutulong sa ligtas na pagsasagawa ng mga gawain sa gabi, at makababawas sa paggamit ng lamparang de-gaas, kandila, at iba pang tradisyunal na pinagkukunan ng ilaw.
Ayon pa sa TIELCO, ang programa ay gumagamit ng solar energy bilang alternatibong pinagkukunan ng kuryente at bahagi ng pagpapaabot ng serbisyo ng elektripikasyon sa mga underserved communities.
