Sinabi ni Pangulong Ferdinand R. Marcos Jr. na patuloy na sinusuri ng mga Regional Tripartite Wages and Productivity Boards (RTWPBs) ang sitwasyon ng sahod sa bawat rehiyon upang matiyak na ang anumang umento sa minimum wage ay naaayon sa umiiral na kalagayang pang-ekonomiya.
Sa isang ambush interview matapos ang paglulunsad ng 2026 National Kick-Off of the School-Based Feeding Program and Milk Feeding Activity sa Pulilan, Bulacan noong Miyerkules, sinabi ng Pangulo na tuloy-tuloy ang pag-aaral ng mga regional wage boards sa tamang antas ng sahod sa kani-kanilang nasasakupan.
“Ang tripartite wage board, sa regional tripartite wage board, patuloy ‘yan, hindi tumitigil ‘yan, patuloy na tinitingnan at inaaral kung ano ba talagang presyuhan doon sa bawat region para mailagay na tama ang ating wage rate kung kailangan ng wage hike,” ani Marcos.
Binigyang-diin ng Pangulo na nauna nang inaprubahan sa National Capital Region (NCR) ang ₱85 na dagdag sa arawang minimum wage, na aniya ay pinakamalaking wage increase na naitala sa kasaysayan ng Metro Manila.
“Ang nauna ay ang NCR, ₱85 ang naging wage hike. Ito ay buong kasaysayan ng Pilipinas, ang pinakamaraming pagtaas ng wages dito, lalo na sa Metro Manila,” dagdag niya.
Ayon pa sa Pangulo, inaasahang matatapos ng mga wage board sa iba pang rehiyon ang kanilang pag-aaral sa mga susunod na buwan, kung saan ang ilan ay target makapaglabas ng rekomendasyon pagsapit ng September o October.
“Ang susunod ay sa mga region pero matagal pa ‘yan, mga September, October pa ‘yung iba. Kaya pag natapos na sila sa kanilang pag-aaral ay ilalabas na rin natin ang naging resulta kung ano ang rekomendasyon ng ating tripartite wage board sa iba't ibang region,” ani Marcos.
Batay sa pahayag ng Pangulo, patuloy na isinasagawa ang regional wage reviews upang matiyak na ang anumang umento sa sahod ay tumutugon sa kondisyon ng ekonomiya at cost of living sa bawat rehiyon.
