Nagsagawa ang Magdiwang Municipal Police Station, katuwang ang Municipal Disaster Risk Reduction and Management Office (MDRRMO), ng Simulation Exercise (SIMEX) on Active Shooting Incident sa Agutay National High School bilang bahagi ng pinaigting na OPLAN Balik-Eskwela para sa School Year 2026–2027.
Isinagawa ang simulation kasunod ng insidente ng pamamaril na naganap kamakailan sa Tacloban City, bilang paghahanda sa mga mag-aaral, guro, at kawani ng paaralan sa pagtugon sa mga posibleng kahalintulad na sitwasyon.
Layunin ng aktibidad na mapalakas ang kahandaan ng komunidad ng paaralan sa pamamagitan ng pagbibigay ng tamang kaalaman at pagsasanay upang mapanatili ang kaligtasan at seguridad ng mga mag-aaral at mga guro sakaling magkaroon ng aktibong pamamaril o iba pang katulad na insidente.
Ayon sa Magdiwang MPS, bahagi ang naturang simulation ng patuloy na pagpapatupad ng mga hakbang upang matiyak ang ligtas at maayos na pagbubukas ng klase sa lalawigan.
Nagpasalamat naman ang pamunuan ng Agutay National High School sa Magdiwang Municipal Police Station at MDRRMO sa pagsasagawa ng simulation exercise, na anila ay makatutulong sa pagpapalakas ng seguridad at kahandaan ng kanilang paaralan laban sa mga banta sa kaligtasan.
