Dahil sa sunod-sunod na tagumpay sa iba't ibang torneo sa bansa, nakatakdang katawanin ng Upper Dapawan, Odiongan, Romblon native na si Arena International Master (AIM) Jerick Faeldonia ang Pilipinas sa 2nd Summer International Chess Open Tournament na gaganapin sa Hulyo 28 hanggang Agosto 2, 2026 sa Royal Benja Hotel sa Bangkok, Thailand.
Lalahok si Jerick sa Standard Category – Challenger Division, kung saan makakaharap niya ang 174 chess players mula sa 29 bansa.
Si Jerick ay Grade 11 student at kasalukuyang miyembro ng Arellano University Chess Team. Bagama't marami na siyang napanalunang torneo sa Pilipinas, ito ang kanyang kauna-unahang pagsabak sa isang international chess competition.
Ayon sa kanyang ama at coach na si Engr. Ernie Faeldonia, malaki ang tiwala nilang magiging maganda ang kampanya ni Jerick sa Thailand dahil sa mataas nitong kumpiyansa at sa magandang momentum na dala mula sa kanyang mga kamakailang tagumpay.
Sa taong 2026 pa lamang, nakapagtala na si Jerick ng apat na kampeonato, dalawang co-championship, at mahigit 20 iba pang parangal, dahilan upang maituring siyang isa sa mga pinakaumuusbong na batang chess player ng bansa.
Samantala, nagpasalamat ang pamilya Faeldonia sa mga indibidwal at organisasyong nagbigay ng suporta upang maisakatuparan ang unang international campaign ni Jerick. Kabilang sa mga ito sina Romblon Governor Trina Firmalo-Fabic, Sta. Fe Romblon Chess Knights, J&A Warehouse sa Looc, AngelFritz Roofing System sa Odiongan, Municipal Engineering Department ng San Jose, Romblon, Dr. Johnah Galicia, Engr. Mario Soriano Jr., DILG MLGOO Carlito Faina Jr., Odiongan Budget Officer Bobby Flores, Barangay Dapawan Chairwoman Anna Lee Forlales, CPA Kriz “Dodoy” Villareal, at Romblon Chess Federation President at Banton Vice Mayor James Fadrilan.
Umaasa ang buong Romblon na makapagbibigay ng karangalan si Jerick sa Pilipinas sa kanyang kauna-unahang pagsabak sa international chess scene at maipagpapatuloy ang kanyang matagumpay na kampanya sa larangan ng chess.
