Pormal na inilunsad ng Department of Trade and Industry (DTI) MIMAROPA ang ika-68 Negosyo Center ng rehiyon sa bayan ng Corcuera, Romblon nitong Hulyo 22 upang higit na mapalapit ang mga serbisyo ng pamahalaan sa mga negosyante at micro, small, and medium enterprises (MSMEs).
Pinangunahan nina DTI Romblon Provincial Director Orville Mallorca, Corcuera Mayor Elmer Fruelda, at Vice Mayor Aubrey Fondevilla ang pagbubukas ng pasilidad na magsisilbing sentro ng business registration assistance, entrepreneurial development, at iba pang suporta para sa mga lokal na negosyo.
Sa paglulunsad ng bagong tanggapan, umabot na sa 13 sa 17 munisipalidad ng lalawigan ng Romblon ang mayroong Negosyo Center.
Ayon kay DTI MIMAROPA Regional Director Amormio “Joey” CJS Benter, magpapatupad ang ahensya ng iba't ibang programa sa Corcuera upang mapalakas ang lokal na ekonomiya at mapahusay ang kabuhayan ng mga residente.
Kabilang sa mga ito ang skills training, technology provision, at product and market development, na nakatuon sa pagpapalago ng mga pangunahing produkto ng bayan tulad ng pandan, buri, at mga root crops.
Ayon sa DTI, layunin ng Negosyo Center na gawing mas madali para sa mga MSME ang pag-access sa mga serbisyo ng pamahalaan at mapalawak ang kanilang kakayahang makipagsabayan sa mas malawak na pamilihan.
Discussion about this post