Hinihikayat ng Bureau of Fisheries and Aquatic Resources (BFAR) ang mga coastal local government units (LGUs) sa Romblon na lumahok sa Malinis at Masaganang Katubigan (MMK) Awards, isang pambansang programa na kumikilala sa mga munisipalidad at lungsod na may mahusay na pangangasiwa sa yamang tubig, pangisdaan, at pangangalaga sa kalikasan.
Sa kanyang talumpati sa 52nd National Nutrition Month Regional Launching sa Romblon, sinabi ni BFAR MIMAROPA Senior Aquaculturist Dr. Lea Dagot na ang MMK Awards ay isa sa mga pangunahing programa ng ahensya na nagtataguyod ng sustainable fisheries, malinis na katubigan, biodiversity conservation, at mas maayos na kabuhayan para sa mga mangingisda.
Ipinaliwanag niya na ang programa, na dating tinatawag na Malinis, Masaganang Karagatan, ay pinalawak upang maisama hindi lamang ang karagatan kundi maging ang mga freshwater at inland fisheries, bilang pagkilala sa kahalagahan ng pangangalaga sa lahat ng anyong tubig.
“The program encourages coastal municipalities to strengthen fisheries management, protect biodiversity, improve the socio-economic condition of fishing communities, and ensure that their aquatic resources remain clean and productive,” ani Dagot.
Ayon sa BFAR, kabilang sa mga pamantayan sa pagpili ng mga mananalo ang epektibong pagpapatupad ng mga fisheries ordinances, mahigpit na kampanya laban sa illegal fishing, pangangalaga sa coral reefs, mangrove forests, at iba pang yamang-dagat, gayundin ang pagpapatupad ng coastal clean-up, tamang pamamahala ng basura, at mga programang pangkabuhayan para sa mga mangingisda.
Isinasama rin sa ebalwasyon ang mga nutrition interventions ng mga LGU bilang pagkilala sa ugnayan ng malusog na yamang tubig, sapat na suplay ng isda, at food and nutrition security.
Sinabi ni Dagot na ang mga mapipiling regional winners ay makatatanggap ng cash incentives na nagkakahalaga ng milyong piso at magkakaroon ng pagkakataong kumatawan sa rehiyon sa national competition.
Upang makalahok, kinakailangang maendorso ang aplikasyon ng municipal agriculturist, provincial agriculturist, alkalde, at gobernador bago isumite sa BFAR Provincial Fisheries Office para sa pagsusuri ng BFAR MIMAROPA.
Binigyang-diin ni Dagot na nakasalalay ang tagumpay ng programa sa sama-samang pagkilos ng mga lokal na pamahalaan, pambansang ahensya, law enforcement agencies, pribadong sektor, at mga komunidad sa pangangalaga ng yamang tubig upang matiyak ang seguridad sa pagkain at kabuhayan ng mga mangingisda.
