Nagpasa ng magkahiwalay na resolusyon ang mga Lokal na Pamahalaan ng Banton at Concepcion na nagpapahayag ng suporta sa panawagan ng mga residente ng Sibuyan Island laban sa planong pagmimina sa isla.
Sa kanilang mga resolusyon, kinilala ng dalawang bayan ang kahalagahan ng pangangalaga sa kalikasan at ang posibleng epekto ng malawakang pagmimina sa biodiversity, watershed, at kabuhayan ng mga komunidad sa Sibuyan.
Ipinahayag din ng dalawang lokal na pamahalaan ang kanilang pakikiisa sa mga residente at iba't ibang sektor na nananawagang mapanatili ang likas na yaman ng isla, na kinikilala bilang isa sa mga may pinakamayamang biodiversity sa bansa.
Ang naturang hakbang ay kasunod ng mga naunang pahayag ng suporta mula sa iba pang organisasyon at sektor, kabilang ang mga environmental groups, religious organizations, indigenous peoples, at iba pang lokal na pamahalaan sa Romblon na nagpahayag ng pagtutol sa planong pagmimina sa Sibuyan.
Patuloy namang isinusulong ng mga grupong kontra sa pagmimina ang panawagang pangalagaan ang kagubatan, watershed, at iba pang likas na yaman ng Sibuyan Island, na itinuturing na mahalaga sa kabuhayan at kaligtasan ng mga residente.
Discussion about this post