Nakaranas ng pagbaha ang apat na bayan sa Tablas Island matapos ang tuloy-tuloy na pag-ulan na dulot ng Habagat na pinalalakas ng Bagyong Inday, ayon sa mga ulat ng mga lokal na pamahalaan at disaster response offices.
Sa Alcantara, 11 na pamilya mula sa Barangay Lawan ang inilikas sa mas ligtas na lugar matapos bahain ang kanilang komunidad. Ayon kay Municipal Disaster Risk Reduction and Management Officer (MDRRMO) Cipriano Marcelo, nakapagtala rin ng pagbaha sa Barangay Madalag at Barangay Gui-ob, habang patuloy na binabantayan ng mga awtoridad ang sitwasyon sa iba pang barangay.
Sa Ferrol, binaha ang ilang mabababang bahagi ng Poblacion at Claro M. Recto kung saan mabilis na tumaas ang tubig sa mga pangunahing kalsada at residential areas. Nakaantabay ang mga opisyal ng barangay, Barangay Disaster Risk Reduction and Management Team (BDRRMT), at mga rescue personnel, habang inihanda na rin ang mga evacuation center sakaling lumala pa ang sitwasyon.
Sa Looc, umapaw ang tubig sa ilang mabababang lugar dahil sa walang tigil na pag-ulan, habang patuloy na mino-monitor ng lokal na pamahalaan ang mga lugar na madaling bahain at ang antas ng tubig sa mga ilog at sapa. Sa panayam ng Romblon News Network kay Police Corporal Christian Magapi ng Looc Municipal Police Station, sinabi nito na ang labis na pag-apaw ng tubig mula sa kalapit na ilog ang pangunahing mitsa ng biglaang pagbaha.
Samantala, nakaranas din ng pagbaha ang ilang mabababang lugar sa Santa Fe, bagama't wala pang naitatalang malawakang pinsala o mga residenteng inilikas sa pinakahuling ulat. Isang bahay ang naiulat na nasira sa Barangay Pandan.
Ayon sa PAGASA, inaasahan pang makakaranas ang lalawigan ng Romblon ng 50 hanggang 100 millimeters na pag-ulan hanggang Linggo bunsod ng pinalakas na Habagat.
Dahil dito, nananatiling nakaalerto ang mga lokal na disaster response teams at patuloy na pinapayuhan ang mga residente, lalo na ang mga nakatira sa mabababang lugar at tabing-ilog, na maging mapagmatyag at sumunod sa mga abiso ng kanilang lokal na pamahalaan.
