Umabot sa humigit-kumulang 500 kilo ng mga plastic bottle ang nakolekta ng mga residente ng Barangay Canyayo at Barangay Agmanic sa ilalim ng programang “PET 2 Rice”, na nagbibigay ng pagkain kapalit ng recyclable plastic waste.
Pinangungunahan ng Public Employment Service Office (PESO) ng Santa Fe ang programa, kung saan ang bawat isang kilo ng plastic bottles ay katumbas ng 30 puntos na maaaring ipagpalit sa mga pangunahing pangangailangan tulad ng bigas, gatas, at chocolate powder drink.
Layunin ng inisyatiba na mabawasan ang dami ng plastic waste sa bayan at maiwasan ang pagtatambak ng mga ito sa landfill, gayundin ang pagsusunog at pagtatapon ng mga plastik na nakapipinsala sa kapaligiran at kalusugan.
Ayon sa lokal na pamahalaan, ang mga puti o malinaw na plastic bottles ay direktang ibinebenta sa mga partner junkshop para sa recycling, habang ang mga berdeng plastic bottles ay tinutunaw at inihahalo sa semento para magamit sa mga proyekto tulad ng pagbubuhos ng kalsada at iba pang pampublikong imprastraktura.
Dahil sa naging positibong pagtanggap ng mga residente ng Barangay Canyayong at Barangay Agmanic, inaasahan ng lokal na pamahalaan na mapapalawak pa ang programa upang mas marami pang mamamayan ang mahikayat na magbukod ng recyclable waste kapalit ng pagkain at kasabay nito ay makatulong sa pangangalaga ng kalikasan.
Discussion about this post