Umabot sa 36 estudyante ang dinala sa Rural Health Unit (RHU) ng San Fernando, Romblon matapos mawalan ng malay at makaranas ng panic kasunod ng magnitude 5.2 na aftershock na tumama sa Claveria, Masbate at naramdaman sa bayan nitong July 14.
Ayon sa Municipal Disaster Risk Reduction and Management Office (MDRRMO), ilan sa mga naapektuhang estudyante ay mula sa Don Carlos Mejias Memorial National High School, habang ang iba ay mula sa iba pang paaralan sa bayan.
Agad na rumesponde ang mga tauhan ng MDRRMO at iba pang emergency responders upang ilikas ang mga estudyante at dalhin sila sa RHU para sa agarang medikal na atensyon.
Batay sa paunang ulat, wala namang naitalang malubhang kaso at nanatiling nasa maayos na kalagayan ang mga estudyanteng naapektuhan matapos mabigyan ng kaukulang lunas.
Bilang pag-iingat, pinauwi rin agad ang mga estudyante matapos ang insidente habang patuloy na minomonitor ng mga awtoridad ang sitwasyon at ang posibilidad ng mga kasunod na aftershocks.
Ayon sa PHIVOLCS, ang magnitude 5.2 na lindol na naitala alas-3:04 ng hapon ay isang aftershock ng magnitude 5.4 na lindol na tumama sa Claveria, Masbate noong July 13.
Patuloy namang pinapayuhan ang publiko na manatiling kalmado, maging alerto sa mga posibleng kasunod na pagyanig, at sundin ang mga ipinatutupad na earthquake safety protocols at abiso ng mga lokal na awtoridad.
