Tinalakay ng Regional Development Council (RDC) MIMAROPA ang pagsasaayos at pagkakatugma ng mga database na ginagamit sa pagtukoy ng mga benepisyaryo ng mga programa ng pamahalaan sa ginanap na Second Quarter Full Council Meeting noong Hunyo 4 sa Odiongan, Romblon.
Sa pulong, binanggit ni Occidental Mindoro Governor Eduardo B. Gadiano ang paggamit ng Community-Based Monitoring System (CBMS) bilang batayan sa pagtukoy ng mga benepisyaryo ng mga programang pang-ayuda ng pamahalaan.
Ayon kay Gadiano, nakatutulong ang CBMS sa pagbuo ng household profiles na maaaring magamit sa pagtukoy ng mga kwalipikadong tumanggap ng tulong mula sa pamahalaan.
Ang usapin ay tinalakay matapos ihayag ni RDC Chairperson at Oriental Mindoro Governor Humerlito Dolor ang mga pagkakaiba sa datos ng CBMS at Listahanan, na kapwa ginagamit sa pagtukoy ng mga benepisyaryo ng iba't ibang programa sa rehiyon.
Sa parehong pulong, sinabi ni Philippine Statistics Authority (PSA) MIMAROPA Regional Director Leni Rioflorido na kasalukuyang nakikipagtulungan ang PSA sa Department of Social Welfare and Development (DSWD) upang pagtugmain ang mga datos mula sa CBMS at Listahanan.
Kabilang sa mga hakbang na ginagawa ang cross-matching ng mga rekord gamit ang National ID system upang mabawasan ang mga pagkakaiba sa datos.
Ayon kay Rioflorido, may mga hamon sa data consistency dahil sa mga pagkakaiba sa mga personal na impormasyon na naitala sa iba't ibang database, kabilang ang mga pagkakaiba sa apelyido at iba pang detalye ng mga indibidwal.
Iniulat din niya na nakabuo na ang Occidental Mindoro ng updated list ng mga mahihirap at hindi mahihirap na kabahayan na maaaring magsilbing sanggunian sa pagpapabuti ng beneficiary targeting ng mga programa ng pamahalaan.
Nanawagan naman si Gadiano sa DSWD at PSA na makapaglabas ng updated at harmonized beneficiary list na maaaring magsilbing opisyal na batayan sa pamamahagi ng mga ayuda at iba pang programa ng pamahalaan.
Samantala, sinabi ni Dolor na inaasahang matatapos pagsapit ng Agosto ang pag-update ng listahan ng mga mahihirap at hindi mahihirap na kabahayan sa rehiyon bago ang nakatakdang Third Quarter RDC Meeting sa Setyembre.
Ayon sa mga opisyal, inaasahang makatutulong ang updated database sa pagpapatupad ng mga programa ng pamahalaan at sa pagtukoy ng mga benepisyaryong saklaw ng mga social protection initiatives sa MIMAROPA. (with reports from Ace Sapit of PIA Oriental Mindoro)
