Umabot sa 29 public-private partnership (PPP) projects ang nakapila para sa pagpapatupad sa rehiyon ng MIMAROPA, dahilan upang maging ikatlo ito sa may pinakamaraming proyekto sa bansa, ayon sa datos ng PPP Center.
Batay sa PPP Center dashboard hanggang Mayo 29, nanguna ang National Capital Region (NCR) na may 39 proyekto, sinundan ng Central Luzon na may 32, habang pumangatlo ang MIMAROPA na may 29 proyekto.
Sa kabuuan, may 250 PPP projects na nagkakahalaga ng P3.15 trilyon ang nasa iba't ibang yugto ng paghahanda sa buong bansa. Samantala, 287 proyekto na nagkakahalaga ng P3.58 trilyon ang kasalukuyang ipinatutupad.
Ayon sa PPP Center, ang mga proyekto sa pipeline ay binubuo ng 167 proyekto ng pambansang pamahalaan na may halagang P3.01 trilyon at 83 proyekto ng mga lokal na pamahalaan na nagkakahalaga ng P133.34 bilyon.
Karamihan sa mga proyektong nakapila ay government-initiated o solicited projects na umaabot sa 195, habang 55 naman ang unsolicited proposals mula sa pribadong sektor.
Sa bilang ng mga proyekto, nangunguna ang maritime at property development sectors na may tig-45 proyekto. Sinundan ito ng information and communications technology na may 23 proyekto at water and sanitation na may 19.
Batay naman sa halaga ng mga proyekto, pinakamalaki ang bahagi ng railway sector na umaabot sa P1.97 trilyon. Kasunod nito ang land transport projects na nagkakahalaga ng P277.26 bilyon at property development projects na may halagang P221.46 bilyon.
Ipinakita rin ng datos na 226 proyekto na nagkakahalaga ng P2.67 trilyon ang nasa project preparation stage, habang 14 na proyekto na may halagang P113.59 bilyon ang sumasailalim sa approval process. Mayroon ding 10 proyekto na nagkakahalaga ng P369.2 bilyon na nasa procurement stage.
Kabilang sa pinakamalalaking proyekto sa pipeline ang North Long Haul Inter-Regional Railway Project na nagkakahalaga ng P678.83 bilyon, ang North-South Commuter Railway Operations and Maintenance PPP Project na may halagang P229.32 bilyon, at ang Metro Rail Transit Line 7 Airport Access-North Line Project na nagkakahalaga ng P130.9 bilyon.
Ang public-private partnership ay isang mekanismo kung saan nagtutulungan ang pamahalaan at pribadong sektor sa pagpopondo, pagpapatayo, at pagpapatakbo ng mga proyekto at imprastraktura para sa publiko.
