Pangkalahatang handa na ang mga pampublikong paaralan sa rehiyon ng MIMAROPA para sa pagbubukas ng School Year 2026–2027 sa Hunyo 8, ayon sa Department of Education (DepEd) MIMAROPA Regional Office.
Sa panayam sa programang Arangkada MIMAROPA, sinabi ni Curriculum and Learning Management Division Chief Wendell Formalejo na patuloy ang koordinasyon ng regional office sa mga Schools Division Office (SDO) upang masubaybayan ang kahandaan ng mga silid-aralan, learning materials, at mga guro sa buong rehiyon.
Ayon kay Formalejo, batay sa patuloy na monitoring at pakikipag-ugnayan ng DepEd sa mga dibisyon ng paaralan sa MIMAROPA, maituturing na handa ang mga pampublikong paaralan para sa pagbubukas ng klase.
Sa ilalim ng Brigada Eskwela, nagsasagawa ang mga school head ng pagsusuri sa mga pasilidad upang matiyak na malinis, ligtas, at maayos ang mga silid-aralan para sa mga mag-aaral. Kabilang sa mga paghahanda ang pagkukumpuni ng mga pasilidad, pagpipintura, at pagsasaayos ng mga sistema ng tubig, sanitasyon, at kuryente.
Upang matugunan ang kakulangan sa silid-aralan at iba pang hamon sa mga isla at malalayong lugar, nakikipag-ugnayan ang DepEd sa mga lokal na pamahalaan para sa pagpapatupad ng iba't ibang hakbang tulad ng pagsasaayos ng iskedyul ng klase, paggamit ng alternatibong learning spaces, at pagtatayo ng mga pansamantalang silid-aralan kung kinakailangan.
Sinabi rin ni Formalejo na patuloy na isinusulong ng ahensya ang pagtatayo ng mga karagdagang classroom at rehabilitasyon ng mga umiiral na pasilidad upang matugunan ang pangangailangan sa imprastraktura ng mga paaralan.
Kasabay nito, minomonitor din ng DepEd MIMAROPA ang distribusyon ng mga aklat, teacher's guide, at iba pang curriculum materials. Inatasan din ang mga paaralan na beripikahin ang kanilang mga imbentaryo upang matukoy ang anumang kakulangan sa mga kagamitang pampagtuturo.
Sa usapin ng kahandaan ng mga guro, sinabi ni Formalejo na nakumpleto na ng mga gurong nakatalaga sa Grades 6, 9, 10, at 11 ang mga capacity-building program bilang paghahanda sa patuloy na pagpapatupad ng pambansang kurikulum.
Ayon pa sa opisyal, nagpapatupad din ang mga Schools Division Office ng mga reassignment at deployment strategy upang matugunan ang kakulangan ng guro sa ilang lugar at matiyak ang sapat na bilang ng teaching personnel sa buong rehiyon.
Patuloy naman ang koordinasyon ng DepEd sa mga school division, lokal na pamahalaan, at iba pang katuwang na sektor upang matiyak ang maayos na pagbubukas ng klase sa Hunyo 8. (with reports from Mary Jane Redoban)
