Namahagi ang Lokal na Pamahalaan ng Banton ng rice assistance noong Hunyo 8 sa 1,603 pamilya na may kabuuang 4,654 benepisyaryo sa ilalim ng programang pinondohan ng Local Government Support Fund (LGSF).
Ayon kay Banton Information Officer at Sangguniang Bayan Member Loi Jorge Fegalan, bawat benepisyaryo, kabilang ang mga sanggol, ay tumanggap ng tig-16 na kilo ng commercial rice batay sa listahang beripikado ng Municipal Social Welfare and Development Office (MSWDO).
Ginamit ng lokal na pamahalaan ang P5 milyong pondong natanggap sa ilalim ng LGSF para sa pagbili at pamamahagi ng bigas sa mga kwalipikadong benepisyaryo sa buong munisipalidad.
Sa pamamagitan ng pamamahaging ito, kabilang ang Banton sa mga lokal na pamahalaan sa Romblon na nakapagpatupad na ng rice assistance program gamit ang pondong mula sa LGSF, kasunod ng panawagan ni Pangulong Ferdinand Marcos Jr. sa mga lokal na pamahalaan na maglaan ng bahagi ng kanilang support funds para sa libreng pamamahagi ng bigas sa mga mamamayan.
Ayon kay Fegalan, layunin ng programa na makatulong sa mga pamilya sa kanilang pangangailangan sa pagkain sa gitna ng pagtaas ng presyo ng mga pangunahing bilihin at iba pang gastusin sa bahay.
Ang Local Government Support Fund ay programa ng pambansang pamahalaan na nagbibigay ng pondo sa mga lokal na pamahalaan para sa pagpapatupad ng mga prayoridad na proyekto at programang nakatuon sa pangangailangan ng kanilang mga nasasakupan.
